AR sawnchhuahna tur chungchanga lehkha pawimawh leh hmalakna zawng zawng hi kan tih vek a ni :Tawnluia

#ZabilianZ Nov 04: MNF NCC member, Dy. CM hlui ni bawk Tawnluia'n AR sawnchhuahna tur chungchanga lehkha pawimawh leh hmalakna awm zawng zawng an tih vek niin a sawi a. AR sawnchhuah chu an dinna nghet nia sawiin, "an kalsan tur ram hi vantlang tana ruahman a ni" a ti.

MNF party chhung inkhawm vawiina neihah he thu hi Tawnluia chuan a sawi a. AR sawnchhuah chu Laldenga sulhnu pakhat zinga pawimawh em em nia sawiin, "kum 1952 ah S. Bartakati Aizawl DC, Luhshai Hills-in Assam Rifle standing order no.II of 1952 a siam a, chu chu Assam gazzette-ah ni 8.8.1952 ah chhuah a ni. Chutah chuan Khatla AR te awmna hi an thingtuah lakna atan chauha pek an ni a, land ownership pek tel an ni lo" a ti a. "An tidanglam thiang lova, an hman loh chuan sorkarah an pelet leh tur a ni", a ti.

Tawnluia chuan, "kum 1986 a remna thuthlung ziah a nih khan Pu Denga ngaih pawimawh hmasakber zing ami chu AR sawnchhuah a ni" a ti a. Zokhawsanga AR ram tura an pek pawh Laldenga CM lai, Revenue Minister a nihlai nia sawiin, "'a tirah kan leng lo e', an ti a, survey neih nawn leh niin, mimal ram te dilin cheng vaibelchhe 92 lai compensate ah sen a ni a, tichuan a ram zau zawng chu acre 1296 niin, ni 31 May, 1988-ah Zokhawsanga an awmna tur hi tihfel sak an ni" tiin, AR sawnchhuahna tura hmalatu chu Laldenga niin a sawi.#zabilianz

AR Biak In hmun chungchang pawh sawiin Tawnluia chuan, "tuna Chief Minister-in MoU draft lo awm tawhah AR neih hlen tur anga a sawi kha thu diklo hulhual a ni" a ti a. "AR lamin draft rawn siam mahse, kan pawmpuilo. Kan sorkarah khan Quarter Guard leh Loch House te pawh hi Mizoram sorkarah an hlan ngei ngei tur a ni tih kha kan thu hnuhnung a ni", a ti.

Tawnluia chuan "Biak In hi Zokhawsanga an insawn hunah Church building leh a compound te hi Mizoram Synod hnenah hlan a ni ang, tih a nih angin kum 1987-ah kan pe a ni", a ti a. "Pu Denga hunah khan kan party office turin tuna Aizawl Dak Inpui te leh AR Biak In hi min kawhhmuh a, Pu Denga erawh chuan kohhran Biak In hi kan khawih thianglo, a ti" a ti a. "AR Biak In hi kan chhuhsak lova, kan lo humhalh sak zawk a ni, tih hi zoram mipui hriatah ka sawi duh a ni", a ti bawk.#zabilianz

Zokhawsanga AR hmun chungchang sawiin, Tawnluia chuan "kum 1988-ah President rule-a kan luh leh tak avangin sawlai ram saw a thing ta thuap mai a. Kum 1998-a kan sorkar leh khan kan CM hnenah, 'Camp sakna tur min dil chhuahpui rawh' tiin an ngen leh a, tichuan tuna an camp sakna tur saw kan President hian Rs. vbc 145 chuang a nawr chhuahsak a ni", a ti a. "Kum 2006 khan land lease-in Mizoram sorkarin AR hnenah kum 99 chhung an awmna turin mumal taka tihfel a ni a, tui, eng leh kawngpui an insawnna tura an mamawh ang chu kan pe vek a ni", Tawnluia chuan a ti.

Kum 2002 ah 'AR chhuahsan tur ram awl chu vantlang tan hman ni rawh se', tih dan an siam niin Tawnluia chuan a sawi a. "Legislation-ah kan pass bawk a ni, a ti. AR lam pawhin an insawn dawn chuan tia tihfel ni rawh se, an tih zawng zawng pawh tihfel vek a ni", a ti bawk.#zabilianz

AR sawnchhuah chungchang chu MNF party Gen. Assembly, kum 1988-ah an lo pass hial tawh niin Tawnluia chuan a sawi a. An hmun hlui pawh vantlang/mipui tan hman ni rawh se, tih thlengin an lo pass tawh niin a sawi bawk a ni.#zabilianz #zabilianznews #zofatehuapzo