SHC Inthlan : Inter-state/district ramri khar rih | vawiin tlai dar 4-ah campaign theih hun tawp dawn

#ZabilianZ Nov 03: Naktip - November ni 5, 2024-a Sinlung Hills Council inthlan lo awm tur avangin November ni 2, 2024 atanga inthlan zawh hma zawng atan inter-state/inter-district ramri (border) hmun thenkhatah khar a nih thu Aizawl District Election Officer, Aizawl Bawrhsap ni bawk chuan nimin khan hriattirtirna a tichhuak.

DEO hriattirnaa a lan danin, inter-state/inter-district border khar te hi - Zokhawthiang; Khawpuar; Zilthawchhuah (Vaitin) leh Luakchhuah (New Vervek)-ah te khar a ni.

Sinlung Hills Council inthlan lo awm tur atana campaign theih hun chu vawiin tlai dar 4-ah a tawp dawn a. Hemi hnu hi chuan political party leh candidate te tan pawh campaign phal a ni tawh lova. Constituency pawn atanga campaign tura kal te pawh an kalna biala vote nei an nih loh chuan bial an chhuahsan tawh tur a ni a, candidate leh election agent te leh party office bearer, state in-charge a ruat te erawh an awm zui thei thung ang.

Electronic media/social media leh a tlukpui dangte-ah inthlan kaihhnawih, mipui rilru sukthlek tidanglam thei thil te tarlan/chhuah phal a ni lova. Mipui ngaihdan lakna 'opinion poll' siam leh 'exit poll' (vote thlak zo te kawmna/zirbingna atanga inthlan result rinlawkna) te neih phal a ni lova, hei hian vote thlak tan hun atanga a zawh hnu darkar chanve thleng a huam a ni.

Polling station atanga metre 100 huamchhung-ah vote dilna anga ngaih thei thil reng reng tih phal a ni lo bawk.