VC inthlan sawn hma - sawrkar sum dinhmun that tawk loh vang

#ZabilianZ Nov 21: Village council inthlan sawn hma chungchangah LAD Minister C. Lalsawivunga'n sorkarin village council inthlan a sawn hma chhan ber chu state sum leh pai te fimkhur leh daihzai taka enkawl leh hman a tul vang a ni ber niin a sawi.

LAD Minister chuan dan pangngaia a kal chuan nakum financial year chhungin election lian pui pui pali buatsaih a ngai dawn tih sawiin, VC leh LC election August/September thlaah, LADC November thla bawrah neih a ngai ang a. 2026 January/February ah AMC inthlan huaihawt a ngai leh dawn bawk tih a sawi a. Post devolution revenue deficit grant nasa taka tlahniam tur kara financial year khat chhunga inthlan hautak tak pali buatsaih chuan sorkar sum bawmah nghawng liantham tak a neih dawn avangin VC inthlan hun chu sawn hma a ni ta niin a sawi a ni.

LAD Minister chuan "nakum financial year chhunga kan post devolution revenue deficit grant nasa taka tlahniam tur kara inthlan hautak tak pali, nuai engemawzat liamna tur hmachhawnin sorkar sum bawmah nghawng liantham tak a neih loh nan section 5 of the Lushai hill distrct (village council) act, 1953-in sorkar thuneihna a pek chu a taka hman mai a thain kan hria a. Nakum lama election neih tur pali zinga a hautak ber VC election bik hi sawn hma mai ila, kan sum dinhmun engemawchen a chhawk zangkhai thei ang tih ngaihtuah chunga he decicion hi siam a ni" a ti.#zabilianz

C. Lalsawivunga chuan "15 Finance Commission period zuihral lamah kan awm mek a. 15 FC hian 14 FC ang lo deuhin recommendation an siam a. An recommendation-ah chuan kan sum hnar lian ber zinga pakhat post devolution revenue deficit grant chu kumtin an titlahniam zel a ni" a ti a. "15 FC period chhungin Mizoram chu Rs. vbc 6544 dawng turin min ti a. 2021-22 chhungin Rs. vbc 1790, 2022-23 chhungin Rs. vbc 1615, 2023-24 chhungin Rs. vbc 1474, 2024-25 chhungim Rs. vbc 1079 leh 2025-26 chhungin Rs. vbc 586 dawng turin min ti a ni" a ti.

A thla bi anga chhut chuan nikum financial year (2023-24) chhung khan thlatin Rs. vbc 122.83 Mizoram sorkarin a dawng thin a. Kumin kum kal mekah thlatin Rs. vbc 89.91 a dawng bawk a. Nakum financial year (2025-26)-ah nasa taka tlakhniam belh lehin thla khatah Rs. vbc 48.83 vel chauh a dawng tawh dawn niin LAD Minister chuan a sawi a. "Khawvel kalphungah thil man zawi zawiin a sang chho ve hret hret a, chung te ngaihtuah chuan Mizoram sorkarin sum a hmuh tur te thiam leh fimkhur taka a hman a ngai dawn a, chu chu tuna decision lian tak kan siam chhan ber pawh a ni ta reng a ni" a ti bawk.#zabilianz

LAD Minister chuan "Kumin te, nikum lam te khan kan sum dinhmunin duhthu sam lo deuh mahse a pangngaia inthlan hi sorkarin a kalpui thei mai ang. Nakum bik hi chu a ring a rek em mai a, tun atangin fing taka inpuahchah a ngai niin kan hotu ten an hria a ni" a ti a. "Sorkar sum dinhmun a chhiat hian a tuar bertu chu mipuite bawk an nih thin avangin VC inthlanin mipuiteah nghawng na taka a neih loh nan hetihian kan ti ta mai a ni. Engkim hi mipuite hmangaihna vanga tih a ni" a ti bawk a ni.#zabilianz #zabilianznews #zofatehuapzo