Khualzin pung chho zel chungchangah Tourism Dept. hotute leh CYMA hruaitute an inkawm

#ZabilianZ Apr 10, 2026: Mizorama khualzin pung chho zel chungchangah vawiin khan Tourism Minister Lalnghinglova Hmar hovin Tourism Department hotute leh Central YMA hruaitute an inkawm a. Khualzin lo dawnsawn leh inzirtirna kalpui kawnga thawhho chungchang an sawiho.

Tourism Deptt. hotute chuan tourism kaihhnawiha eizawng hrang hrang te bakah, khualzin te hriattur pawimawh buatsaiha sem thin a nih thu leh YMA-in ngaihpawimawh zawng a neih chuan sawrkar a inhawn thu an sawi a. Mizorama tourist site hrang hrangte hlutna leh nihna phochhuak tur leh khualzin te pawhin hlawk leh tangkai zawka hun an hman theih nan tour guide training kalpui mek a nih thu an sawi.

Homestay hman dan dik tawk lo awm thin chungchang te, ILP leh PAP (protected area permit) kalpui danah tourism thlirna atanga rawtna awmte an sawihova. Tourist ten harsatna an tawha an biakpawh theih tur YMA branch hrang hrang atangin inruat theih a ni em tih te an sawiho bawk.

Tourism Minister Lalnghinglova Hmar chuan Mizoram tlawhtu pung zel chu sum leh pai leh a tha zawnga Mizoram tarlan kawngah thil lawmawm a nih rualin, thil thalo ken tel a neih theih avanga fimkhur taka lo dawnsawn a tul thu a sawi a. September ni 13, 2025-a Sairang thleng rel a lo luh hnu ah nikum October thla atang khan chawhrualin thlakhatah mi nuaikhat chuang tourist an awm sawiin, nikum khan tourist nuai 8 chuang an awm niin a sawi a, kuminah a aia tam an awm an rin thu an sawi.

Mizo hnam ziarang leh khawtlang nunphung tidal si lova khualzin lo dawnsawna, inven tulna kawngah lo inveng thei tura nasa taka zirtirna kalpui a tul thu Tourism Minister chuan a sawi a. "YMA nen thawhho kan duh a ni.” tiin, Synod hruaitute nen an inkawm tawh thu leh kohhran dang te leh NGO dang te nen pawh inrawnkhawm chhoh zel an tum thu a sawi bawk.

CYMA President R. Lalngheta pawhin CYMA pawhin Mizoram rawn tlawhtu ten hun hlimawm leh nuam tak hmang se an duh thu sawiin, a sahawk lutuk leh a ram neitute awm tinuamlo zawnga khawsa erawh an awm palh theih thu leh chutiang a thlen loh na tur chuan Mizoram mipuite bakah khualzin te hriattur pawimawh, an cham chhunga an tih tur leh tih loh tur mumal tak siam tha a tih thu a sawi.

Ram leh hnam tana hmasawnna turah chuan sawrkar tichaka, thawhpui turin CYMA a inhawng tih sawiin, thawhhona mumal nei tura thuthlun chungchang pawh an lo ngaihtuah tur thu CYMA aiawhte chuan an sawi a ni.#zabilianz #zabilianznews #zofatehuapzo