#ZabilianZ Apr 11, 2026: AMC inthlan lo awm tura Ward no. 4-a MNF candidate R. Lalnunthari (Nunui Rualhleng)-in AMC-ah MNF-in sorkarna a chan chuan AMC inrelbawlna tha zawk leh chak zawk siam an tum thu a sawi.
Aizawl Press Club-ah thuthar thehdarhtute kawmin he thu hi vawiin khan R. Lalnunthari chuan a sawi a. Local Council leh Ward committee te mawhphurhna a mumal zawk theihna tura ruahmanna siam a nih tur thu a sawi bawk.
AMC hnuaia development hnathawh reng reng kuttling leh mawi, belhchiandawl a nih zel theihna tura hmalak a nih tur thu te, chak leh langtlanga hnathawh a nih tur thu leh thawktu indaihloh avanga hna muang thin tiziaawm tura thawktu lak belh tum a nih thu te a sawi.
Bawlhhlawh paihna/sawngbawlna hmun siam belh tura hmalak a nih tur thu leh bawlhlawh tihriral dan tha zawk leh mumal zawka kalpui a nih tur thu te, bawlhhlawh tawih thei hmanga lei tha (bio-fertilizer) siam tura hmalak chhunzawm a nih tur thu te, veng thenkhat lirthei luh theihlohnaah bawlhhlawh paih dan mumal zawk ruahman a nih tur thu te sawiin, "Septic tank khat tawh paihna hmun siam belhin, tuna kan neih mekte hi tihchangtlun a ni ang" a ti bawk.
Aizawl khawpui 'plastic free city' a puan tawh a hlawhtlin zel theihna tura chak leh felfai zawka hmalak a nih tur thu te, ran vulh leh khuahkhirh kawngah Local Council-te be rawna mipui zawh tawka hmalak a nih tur thu te, sa leh thlai thianghlim chauh zawrh a nih theihna tura hmalak zel a nih tur thu te, Aizawl veng hrang hranga Bazar tam zawk leh changtlung zawk siam a nih tur thu te a sawi.
Mizoram leh Mizo hnam himna tur leh Mizo sumdawngte tana hamthatna tura AMC Licensing Regulation ennawn a nih tur thu pawh R. Lalnunthari chuan a sawi a. Leimin leh lei tlahniam laka Aizawl a him zawkna tura tuihawk luankawr tha zawk leh a khuhna siam belh tum a nih thu te, Local Council area hrang hrangah CCTV a tam thei ang dah belh a nih tur thu te, Aizawlah khualzin leh pemlut an pun zel avangin mumal zawka inawpna a awm theih nan Aizawla cheng dik tak te chhinchhiahna uluk zawka kalpuia, nau piang, mitthi leh pemlutte chhinchhiah an nih tur thu a sawi bawk.
R. Lalnunthari chuan Aizawl khawpui faina leh mawina (beautification) lam hawia hmalakna kal mek chhunzawm zel a nih tur thu sawiin, Aizawl khawpui kawtchhuahah Aizawl Gate siam a nih tur thu a sawi a. Aizawl mipuite chu MNF candidate te lo vote theuh turin a ngen nghal bawk a ni.#zabilianz #zabilianznews #zofatehuapzo
0 Comments