Sawrkarin Aizawl West II bial a duat - kum khat chhung lekin Rs. nuai 4500 chuanga thuam tura pawisa dah tawh a ni :Bialtu MLA

#ZabilianZ Jan 28: Aizawl West II bialtu MLA, Minister of State Lalnghinglova Hmar-in Mizoram sawrkarin Aizawl West II bial chu a duat hle nia sawiin, "kum khat chhung lekin cheng nuai 4500 chuanga thuam tura pawisa dah tawh a ni" a ti.

Aizawl West II biala ZPM LC candidate-te inhmuhkhawmna nimina Vaivakawn-a neihah he thu hi bialtu MLA Lalnghinglova Hmar chuan a sawi a. Tuikual South atanga Dinthar veng thleng kawngpui thar sialna tur sum pek an ni tawh nia sawiin, "Tuikual lui kam tluanin kawngpui kan nei dawn" a ti a. Local Council inthlan zawh ve leh tender chhuah a nih tur thu a sawi.

He kawng siamna atan hian administrative approval leh expenditure sanction hmuh a nih tawh thu bialtu MLA chuan sawiin, cheng vaibelchhe 20 dah a nih thu a sawi a. "Kawngpui siam zawh a nih rualin Tuikual leh Dinthar veng mawng ber ber te chu kawngpui lian kama cheng in ni tawh ang, kuminah hna kan țan dawn" tiin, "MLA inthlan dawn khan min intiamtir in tum țhin kha a ni a, kan intiam duh lova, a takin kan tihlawhtling thung dawn a ni, " a ti.#zabilianz

Lalnghinglova Hmar chuan "Aizawl tlaklam mipui zawng zawngin an chhawr tur Vaivakawn Bazar sak țhatna tur sum pawh a lo thleng tawh" tiin, Local Council inthlan avanga MCC-in a phuar loh ruala tender tura sawrkar a inpeih tawh thu a sawi a. "December 6 khan sawrkar laipuiin SASCI hnuaiah Rs. vbc 300 min pe a, chumi atang chuan Vaivakawn Bazar sakna atan cheng vaibelchhe 25.35 dah a ni a, restricted tender hmangin a thawktu tur PWD-in an thlang dawn a, thawh zawh thuaia utilisation certificate pek zung zung țul a nih avangin Committee meeting chuan rang taka kalpui a tum," a ti bawk.

Vaivakawn - Mizoram University kawngpui pawh a siamțhat hna thawh mek a nih thu leh a chhe zualpui hnawh mam zawhah chhah țha taka bituminuous concrete hmanga chhun khah vek tur a nih thu Lalnghinglova Hmar chuan a sawi bawk a ni.#zabilianz #zabilianznews #zofatehuapzo