Mizorama zirna dinhmun zirchiang turin NITI Aayog kan sawm :Education Minister

#ZabilianZ Apr 21: Education Minister Dr Vanlalthlana'n Mizorama zirna dinhmun zirchiang turin NITI Aayog sawm an nih thu sawiin, "an zirchianna hmangin education summit kan huaihawt dawn a, kan harsatna lai zawn chhuah leh a sutkian dan tur ngaihtuahho turin hmachhawp kan nei mek" a ti.

ZPM party chhung inkhawm vawiina neihah he thu hi Dr Vanlalthlana chuan a sawi a. Hei bakah hian Mizoram Education Reforms Committee din a nih tuh leh nasa taka hma an lak thu a sawi. 

Zirtirtu sem rual na turin transfer rules an buaipui mek nia sawiin Education Minister chuan "kan hrualmum thei tep tawh" a ti a. School siam that leh sak that hna te, zirtirtu dinhmunte mipui hmuh theih turin vskmizoram.com ah an phochhuah thu leh mipuite pawhin lo ngaihven se a duh thu a sawi.

Minister chuan Mizoram Government School Teacher’s Union (MIGOTSU) ten bagde dum bela sawrkar laka lungawilohna an lantir mek chungchang pawh sawiin, education department-in theihtawp chhuaha an tana hma a laknate ngaihtuah chuan an lungawi zo lo chu mak an tih thu a sawi a. Dan awm sa in school upgrade tura a huam loh te pawh an tel theihna tura dan an siam belh mek thu leh an tana hma an lakna te chu ngaichang thiam sela a duh thu a sawi. College lamah pawh zirtirtu indaihlohna a nasat thu sawiin, MPSC kaltlanga Lecturer 30 direct-a lak tum mek a nih thu a sawi bawk.

Dr Vanlalthlana chuan, sawrkarna an chan tirhin India rama zirna tehfungah Mizoram chu State leh UT 36 zinga a hniam ber dawttu a nih thu sawiin, he dinhmun chhuanawm lo tak ațanga hmasawn tura theihtawp an chhuah thu a sawi a. He dinhmun hi sawrkar hmasa ațanga an chhawm, ZPM sawrkar tan an bultanna a nih thu sawiin, "He dinhmun atang hian midangte umphak tumin thapui thawhin kan tlan mek a, kum 20 leh kum 15 chuang lo sawrkar tawh te khan kan ram zirna siamthat an tum tak tak em tih chu kan dinhmun atang hian a lang chiang hle a ni" tiin, "Heti chung hian nasa takin min bei a, min beihna lam apianga hawi hman kan ni lo, State leh UT dang te umphak tumin Mizoram sawrkar chuan hma lam kan pan mek, sawrkar hmasate khan theihtawp an chhuah lo kan ti lo, amaherawhchu, min thlenpui chin hi a lungawithlak loha, hmasawn kan ngai em a ni" a ti.

Sawrkar hmasain an term tawp dawn lamah tlanchhe chungin school 180 chu sawrkar school ah a puang nia sawiin, "dan behchhan tur awm miah lovin school 52 chu Provisional Adhoc – ah hlankai an ni" a ti a. Lumpsum School awmsa leh a thar an puan chu 108 lai a nih thu a sawi bawk. "Upgradation atana School an chhawpchhuah thenkhat chu naupang pawh nei lo te, bulding pawh nei lo te, thenkhat awm tawh lo (defunct) tawh te leh khawtlang enkawl pawh ni lo private school te an lo awm a, MLA inthlan awm tur thlir chunga an tih a nih avang khan a phuailuai hle a ni,”a ti bawk.#zabilianz #zabilianznews #zofatehuapzo