Moriah Blind School-in an zirlai ni thin MIS-a inziaktling an lawmpui

#ZabilianZ Apr 01: Moriah Association for the Blind board member leh zirtirtu ten vawiin khan Moriah Blind School-a an zirlai ni thin, MIS-a inziaktlinga I&PR Deptt-a Information & Public Relation Officer ni ta N. Vahneichhi chu a Pisa-ah lawmpuina hun hmangin, an pawl Treasurer Lalremsangi Fanai-in lawmpuina thuziak a hlan.

N. Vahneichhi hi kum 2005-ah naupang kum 5 mi a nih laiin Moriah Association for the Blind enkawlna hnuaiah a lo awm tawh thin a. Moriah Blind School enkawltute avanga tun dinhmun thleng thei a nih thu sawiin, "Kan dam chhung ni tehna hi kum zat ni lovin, kan thil tih avanga mi ten thinlunga min hriat dan hi kan dam khua tehna a ni" a ti a ni.#zabilianz 

He hun hi an Chairman Dr. H. Lallenmawia'n a kaihruai a. Moriah Blind School an din chhan sawiin, a fapa mitdel ve tho a nih avanga mitdel te tana mithahnemngaite nen Pathian rawngbawlna a nih hriaa Mizorama mit khaw hmulote chawikân an tul zia hriaa kum 2003-a an din a nih thu a sawi.

Founder Vice Chairman PB Sangthanga pawhin thusawiin, amah ngei pawh a naupan lai atanga mitdel a nih thu te, Phuaibuang atanga chhungkaw harsa tak chunga Kolasib mitdel school-a kal chhuak a nih thu a sawi a. Tunah PHE Dept-ah hna tha tak thawka mitdel te welfare tan a tih theih ang ang te tih a duh thin avanga Moriah Blind School chu din an nih thu a sawi ve bawk.#zabilianz #zabilianznews #zofatehuapzo