#ZabilianZ Nov 08: November ni 7, 2025-a Red Bull Aizawl Tlang Ruam (Urban Downhill Racing) neihnaa mawi lo taka Mizo hnam lam - Cheraw- kaihleka lam an awm chungchangah vawiin khan MZP hruaitu ten Red Bull lam aiawhte thil awmzia an zawtfiah a. Mizo hnena ngaihdam dil turin a mawhphurtute an phut.
Red Bull aiawhte chuan he thila mawhphurtu ber chu contract an ziahpui zing ami content creator Yashwi Arora, Producer Red Bull India, a nih thu an sawi a. Yashwi Arora hian tukin dar 7 vel khan Mizoram a lo chhuahsan tawh thu leh Mizo mipui hnena ngaihdam a dil ngei theihna tura an lo biak tur thu an sawi niin MZP hruaitute chuan an sawi.
Mizo hnam lam tibawrhbanna kawnga a mawhphurtu Yashwi Arora chuan Mizo mipui hnenah ngaihdam a dil lo a nih chuan a tawp thlenga umzui an tum thu MZP hruaitute chuan an sawi a ni.
He thil thleng chungchangah hian Mizo Cultural Organisation (MCO) Gen. Hqrs. pawhin thuchhuah siamin, hnam rohlu, hnam ziarang - culture tihbawrhbanna a nih thu leh a titute an dem thu tarlangin, Mizo mipui hnena ngaihdam dil turin an phut a. Art & Culture Deptt. pawhin Mizo hnam lam tibawrhbang zawnga lam entir lai video darh chungchangah hmalak an tum thu an sawi bawk.
He thil thlenna veng - Republic vengthlang Local Council leh branch YM pawhin thuchhuah intawm siamin, an veng chhungah Mizo hnam lam tibawrhbang zawnga thil tih a awm chu pawi an tih thu leh an dem thu an tarlang a. Mizo culture artistes' association (MCAA) pawhin na taka hma an lak tur thu thuchhuah siama tarlangin, thuneitute hmalakna an thlawp zel tur thu an tarlang bawk a ni.#zabilianz #zabilianznews #zofatehuapzo
0 Comments