#ZabilianZ Nov 09: ZPM party-in election dan bawhchhiaa Chief Minister Lalduhoma puh a nih chungchanga a insawifiahna Election Commission of India (ECI)-in a pawm lo nia sawi awm chu thu diklo a nih thu an sawi.
Chief Minister insawifiahna ECI-in a pawmsak lo anga chanchinbu leh social media hmanga thu diklo thehdarh an awm niin ZPM chuan an sawi a. MNF party-in election dan bawhchhiaa Chief Minister an puhna chungchangah ECI-in dakar 48 chhunga insawifiah turin November ni 6, 2025 khan Chief Minister chu a hriattir nia sawiin, nimin chawhnu lam khan Chief Minister insawifiahna chu ECI-ah thawn a nih chauh thu an sawi a ni.
MNF-in Chief Minister an puhna pakhat - Dampa bial bye-election atana a campaign-na ah chi leh chi inkara inhuat theihna tur lam hawi thu a sawi nia an sawi pawh ZPM chuan "Pu Zoramthanga Chief Minister a nih hmasak ber tuma zawhna a chhanna a sawi chhuak mai a ni" an ti a. "Chi leh chi inhuatna tuh tumtu an zawng a nih hrim chuan, an pu ber hi hek hmasak awm tak a ni" an ti.
ZPM chuan "MNF-in vote zawnna atana project thar puang anga Chief Minister an puhna pawh hi bye-election neih tur Election Commission of India-in a puan hmaa project kalpui tawh te an ni" an ti a. "Election model code of conduct-in project kal mek a phuar lo tih hi an hre fuh chiah lo niin a lang" an ti bawk.#zabilianz #zabilianznews #zofatehuapzo
0 Comments