#ZabilianZ Nov 09: MPCC Treasurer Dr. Lalmalsawma Nghaka'n Dampa bial mipui ten Mizoram tan thil ropui tak an lo ti tawh thin nia sawiin, "kum 1983-ah Pu Liansuama, Congress candidate chu bye-election ah an thlan tlin avangin kum 1984-ah Congress sawrkar a lo piang" a ti a. Congress sawrkar chuan kum 1986-ah Mizoramah remna leh muanna nghelnghet tak a siam theih phah niin a sawi.
Nimin khan Aizawl Press Club-ah thuthar thehdarhtute kawmin he thu hi MPCC Treasurer chuan a sawi a. Mizoramin tun thlenga remna leh muanna neia, ram ral muang a nih theih chhan chu Dampa bial mipuiin kum 1983-a Congress candidate Pu Liansuama an lo thlan tlin vang niin a sawi a ni.
MPCC Treasurer chuan Mizoram sawrkar chu an intiamnaa dingnghet lovah puhin, "Zoram mipui kan rum phah mek" a ti a. MNF sawrkar-ah pawh mipui an rum nia sawiin, "kan retheih phah zual nasa hle" a ti.
Congress party chu an intiamnaa dingnghet thin nia sawiin, Dr. Lalmalsawma chuan "heng thil te hrereng chung leh kum 2028 rilrua neih tel chungin intiamnaa dingnghet thin sawrkar a lo pian theih nan leh dawt leh thudik chanve hmanga mipui vehthlema an awm tawh loh nan, kan ramah dikna a lal theih nan bye-election hmang hian Dampa bial mipui te hma hruai leh turin ka ngen a ni" a ti bawk.#zabilianz #zabilianznews #zofatehuapzo
0 Comments