#ZabilianZ June 19, 2026: Kolasib Bawrhsap H. Dolianbuaia'n Kolasib district-ah khualzin hip thei tur festival liantham tak pahnih buatsaih tuma hmalak mek a nih thu a sawi.
Kolasib District Tourism Management Committee (DTMC) thutkhawm vawiina neihah he thu hi Kolasib Bawrhsap chuan a sawi a. Kolasib district-ah khualzin te tlawh tlak hmunhma tha tak tak an neih thu sawiin, "heng te hi pholanga, hma kan sawn chuan a hlawkpui ber tur chu mipuite an ni," a ti bawk.
Tourism Department Deputy Director Rachel Lalrinhlui'n India ramah Mizoram chu khualzin tlawhtu pun chakna ber a nih mek thu a sawi a. Kolasib district-a khualzin hip thei hmunhma pawimawh zualte thlang chhuaka, engtianga tlangzarh leh tihhmasawn zel tur nge tih district level-a ngaihtuahho a pawimawh thu leh khawtlang mipui nena thawhhona leh mipui zirtirna (awareness) uar taka kalpui zel a tul thu a sawi bawk.
Report-a a lan danin, kum 2025-26 chhungin Kolasib district tlawhtu khualzin sing 9, za 5 leh 33 an awm a, heng zinga 35 te chu ram dang mi (foreign tourist) an ni a. Kum 2025-26 chhunga Kolasib district tlawhtu khualzin hi Mizoram tlawhtu khualzin zawng zawng atanga chhutin za-a 9.24 a ni.#zabilianz #zabilianznews #zofatehuapzo
0 Comments