High Court-in Hindu atanga Muslim-a inlet, an chenna in-a hrenbeh te hnena zangnadawmna Rs. nuai 25 pe turin UP sorkar leh hmeichhe chhung te a hriattir

#ZabilianZ Aug 11, 2026: Allahabad High Court-in Hindu hmeichhe pahnih Muslim-a an inleh avanga an chenna in-a hrenbeh te hnena zangnadawmna Rs. nuai 25 pe turin Uttar Pradesh sorkar leh hmeichhe chhung te a hriattir.

Uttar Pradesh-a Hindu hmeichhe pahnih - kum 35 mi Anshu Bhatia leh a nau kum 20 mi Diya Bhatia te chu Muslim-a an inleh avangin an in-ah hrehbeh an ni a. An unau-in Court-ah inlanin, kum 2021 leh 2020 ah te anmahni duhthlanna ngeia Islam sakhuaa an inleh thu Court chu an hrilh. An rinna leh chhia leh tha hriatna hmanga thutlukna siam an nih thu leh tharum emaw, inbumna leh tihluihna emaw a tel loh thu an sawi.

Court chuan hmeichhe pahnihte chu "puitling an nih tawh avangin India Danpui hnuaiah sakhua, chenna hmun leh an mimal nun chungchangah mahnia thutlukna siam theihna dikna chanvo an nei" a ti a. Chhia leh tha hriatna hmang tura zalenna an neih chuan mahni duhthlanna ngeia sakhaw thlan emaw, hnawl emaw, thlakthleng theihna dikna chanvo a huam tel vek thu a sawi bawk.#zabilianznews

Court thupeka tarlan a nih danin, heng Hindu hmeichhe pahnih te Muslim-a an inleh avanga in-a hrenbeh an nih thu chu Uttar Pradesh sorkar pawhin hre mahse, hmalakna a neih loh avangin Court chuan heng hmeichhe pahnih te unaupa leh Uttar Pradesh sorkar chu zangnadawmna Rs. nuai 25 chawi turin a ti ta a ni.   

Heng hmeichhia te pa hnenah pawh Court chuan a fanu te passport, zirna certificate, identity document, bank record te leh an thil neih dang zawng zawng pawh pelet vek turin a hriattir a. An mimal zalenna, chetvel/veivahna, chenna hmun, eizawnna leh sakhaw duhthlanna kawngah inrawlh tawh lo tura tiin, "nu leh pa te thuneihna hian an fa, puitling tawh te dikna chanvo leh mimal zalenna chu a luahlan thei lo" a ti bawk.

Court chuan sakhaw inleh kawngah Uttar Pradesh dan zawm a ni em tih chu a hranpaa enfiah theih a nih thu pawh tarlang tel mahse, chu dan chu bawhchhiat a nih pawhin hmeichhe puitling, an duh lo chunga khuahkhirh/hrenbeh chu thiam chantir theih a nih chuan loh thu a tarlang tel a. He dan bawhchhiatna hi thil pawi leh liantham tak niin an a tarlang bawk.#zabilianz #zabilianznews #zofatehuapzo