MLA hluiin ngaihdam dila insawifiah ngei turin Chief Minister a phut

#ZabilianZ Aug 21, 2026: MNF General Secretary Dr. Vanlaltanpuia'n Chief Minister Lalduhoma chu Memorandum of Settlement chungchang a sawi dan avanga ngaihdam dil ngei tur a nih thu a sawi.

MNF party chhung inkhawm vawiina neihah MLA hlui Dr. Vanlaltanpuia chuan "Chief Minister-in Memorandum of Settlement chungchang a sawi dan kha inremna tihlawhtlingtu India sorkar tan pawh rilru natna tham a tling" a ti a. "Kan CM hian ngaihdam dil ngei rawh se," a ti bawk.

Chief Minister Lalduhoma'n Mizoram Law College zirlaite hmaa Memorandum of Settlement leh ILP chungchang a sawi dan chuan Mizo hnam pawi nasa takin a sawi niin a sawi a. Lalduhoma thusawi chuan inremna ngaihhlut hlawh tak chu nep takah a chhuah nia sawiin, MNF chuan an ngai thu tak hle tih a sawi.

Dr. Vanlaltanpuia chuan "Mizo hnam movement kha Mizo zawng zawng ta a ni a, a man kan pek pawh a sang hle" tiin, "kan hnam martar te khan vawiin atan an naktuk an hlan a, Mizo mipui ngenna avanga inremna dawhkan kil chauh kan ni" a ti a. "Independence chu ni rih lo mah ila; Memorandum of Settlement kha kan political Genesis a nih avangin kan ngaihlu a, a ken tel India Constitution a ziahluh thar Article 371(G) nghehlohna zeldin thubawl leh mipui tiralkhel zawnga kan CM ber a tawng kha hruaitu ropui tawng dan tur a ni lo a ni" a ti bawk.

MNF General Secretary Dr.Vanlaltanpuia chuan CM chu campaign laia ti ve lo tura a intiam te pawh nasa taka ti leh si-ah puhin, "khaw engah mipui hmuh leh hriat vek turin blanket approval a pe leh si a, inthlan campaign laia a huat bera a sawi restricted tender lah a pe nasa bertu a ni a, hengte hi engvângin nge tunah insawifiahna tinrêng nen a pek leh si, tih hi CM ka zawt a ni," a ti.

Chief Minister Lalduhoma\n TV interview leh Assembly session-a Unnati chungchang a sawi dan a inanglo nia sawiin, Dr. Vanlaltanpuia chuan - Lalduhoma'n Unnati loan a la ngei a nih chuan a lakna document leh a lak zat mipui hriata puanzar a phut a. "Congress Vice President-in Lengpui ram hralhna atanga Rs. vbc 10 vel CM-in a dawn thu chiang taka a hriatthawi thu a sawi pawh kha CM hian a sawifiah ngei ngei a tul a ni" a ti bawk.#zabilianz #zabilianznews #zofatehuapzo