#ZabilianZ Aug 27, 2026: Mizoram Pradesh Congress Committee (MPCC)-in BJP sorkar-in India mipuite Vande Mataram sak luihtir a tum nia sawiin, hei hi an do zel tur thu an sawi.
MPCC hruaitute chuan India rama Congress Working Committee (CWC)-in hemi chungchang hi kum kum 1937-ah a lo ngaihtuah tawh thu sawiin, he hla chang 1-na leh chang 2-na chauh chu sak ni se, tia thluthlukna a lo siam tawh chu an dinna a la nih reng thu an sawi a. Vande Mataram chang 1-na leh chang 2-na chu ram hmangaihna lam hawi a nih thu leh a chang dang chu Hindu pathian - Durga leh Lakshmi biakna leh fakna thu a nih avangin sakhaw dang betu tan sak a rem ve lo niin an sawi.
Foreign Contribution (Regulation) (Amendment) Bill, 2026 pawh an do zel tur thu MPCC hruaitute chuan an sawi a. He bill-in a tum ber chu ram pawn atanga tanpuina hmanga minority leh kristian ten India ram mipui tana an lo din school, college, hospital leh charity home te chhuanlam chi hrang hrang hmanga tihtawp leh chhuhsak a nih thu sawiin, "a bill-ah chiang takin a inziak a ni" an ti.#zabilianznews
BJP sorkar-in Joint Parliamentary Committee (JPC) ngaihtuah atana he bill a pek chungchangah pawh "JPC member tam zawk BJP an nih dawn avangin Congress party chuan tha kan ti lova, ngaihthatna tur a awm kan hre lo" an ti bawk.
Ni za inhlawhna - MGNREGA thlakna VB-G RAM G pawh "hlawhtling lo tura duan sa a ni" MPCC hruaitute chuan an ti a. "VB-G RAM G Act ah mipuiin thuneihna an nei tawh lova Central sorkar-in fund allocation ah duhsak zawng leh duhsak loh state neih theihna thuneihna sang tak a nei a ni" an ti.#zabilianz #zabilianznews #zofatehuapzo
0 Comments