Kha chanchin khan mitin min thawng a, Zoram mipuite kan thin a rim em em a nih kha. A veng neitu Repblic veng pawhin tualthattu kha khaihlum ve ngei an duh a, hei hi Zoram mipui duh dan pawh a ni. Chutihlaiin Pu HTC Lalrinchhana, Addl. District & Session Judge chuan damchhung tang turin a hrem ta zawk a ni.
Kha thil thlen hnu ah pawh khan a khat tawkin kan ramah hian tualthahna rapthlak tak tak leh rawva tak tak a thleng ta fo mai. Mi neih it vang leh mipat hmeichhiatna rawngkai tualthahna a thlen rualin, chutiang pawh ni chuang lo, suahsual vang hrim hrim pawhin a thleng fo mai.
Hmanni lawka tleirawl duhawm tak mai Ramdinpuii thihna te kha a rapthlakin mitin min thawng a nih kha. A laichin hnai ngei maiin dimdawina tel miah lovin an that tawp mai a nih kha. Hetianga rawng taka tualthattu hi chu mipui pawhin khaihlum kan duh fur awm asin mawle.#zabilianz
India danah hian tualthattu khaihlum (death penalty) tura hrem harsat zia hi kan suangtuah phak lo mai thei a ni. Thi tura hrem theitu chu Session Court an ni a, Session Court tih hian an hnuaia Addl. Session Court a huam tel tih kha rilruah lo awm ta se. Session Court hi criminal case a trial khawih thei Court sang ber a ni a, Special Court ngaihtuah bik tura danin a ruahman a nih si loh chuan a ngaihtuah theih loh khawpa case sang a awm lo a ni ber.
Session Court rorelna chu a taka kengkawh tur chuan High Court-in a pawmpui a ngai a, High Court-in a pawmpui a nih pawhin Supreme Court-ah ama sum sen ngai lo pawhin appeal theih a la ni ta fova. Supreme Court pawh chuan thi tura hremna chu lo nemnghehpui pawh ni se, President of India hnenah ngaihdam a la dil leh theih a, chumi hnuah meuh chuan kum tak tak a lo liam tawh thin.
Hetianga case a kal lai hian lo khaihlum ngawt theih a ni lova. Kum tam a liam hnu ah chuan thi tura tih thenkhat chu dam chhung jail tang (life imprisonment) tura tih leh zawk an ni leh mai thin, khaihlum tak tak chu tlem te an ni.#zabilianz
Kan hriat tur chu dam chhung jail tang tura tih te hi chi hnih ang deuhin a kal a - pakhatna chu dam chhung tihah pawh thih hma zawng (which may extend to imprisonment for life, which shall mean imprisonment for the remainder of that person’s natural life) tih a ni a, a pahnihna chu dam chhung (shall be punished with death or imprisonment for life) tih niin, kum 25 velah chuan chhuah zalen mai theih an ni tawh thin.
Tualthah (murder case) hi a pahnihna zawkah khian a awm a, chutih laiin pawngsual (rape) leh kumtlinglo mipat, hmeichhiatna hmanpuiah pawh hremna na ber chi ah chuan pakhatna khi hman tur a ni thung.#zabilianz
Pu Sangliansiama te chhungkua thattu chungchang ngaihtuahtu Pu HTC Lalrinchhana kha a lo fing thiam ngawt mai. Mipuite pawhin khaihlum tura an duh lai khan a ni chuan dam chhung tang turin a ti a, mahse, pawisa a chawi tur (fine) kha a tam hle mai a, ka chiang ta chiah lova Rs. nuai 80 vel lai a ni. Kha kha a pek theih loh chuan dam chhung bakah kum 80 a tan bel dawn tihna a ni.
Kan sawi tak ang khan Pu HTC Lalrinchhana khan khaihlum turin lo rel ta sela, High Court/Supreme Court emaw President of India pawhin dam chhung tang turin lo thlaksak ta sela, kum 25 vel a tan hnu chuan a rawn chhuak heu mai dawn a ni.#zabilianz
Heng atang hian thi tur meuha inhrem harsat zia a chiang thei mai awm e.
#zabilianz #zabilianznews #zofatehuapzo
0 Comments