#ZabilianZ Sept 28, 2026: Kar kalta Zirtawpni zan leh Inrinni (Sept 25 leh 26) khan Mizo Christian Church, Indianapolis, USA-ah USA Zofate Inpumkhatna Inkhawmpui vawikhatna buatsaih a ni a. He inkhawmpuiah hian Rev. Dr. Zaichhawna Hlawndo lehkhabu ziak - 70 Reflections on Christianity, Nationality and Politics - chu tlangzarh a ni.
Zofate inpumkhatna Inkhawmpui hi Zoram Thar Hqrs., Mizoram leh Zoram Thar USA Branch ten an buatsaih a ni a. Zoram Thar Hqrs., Mizoram President Rev. Dr. Zaichhawna Hlawndo chuan "Zofate hi thlahtu bul thuhmun vek kan ni" tiin, "kan inpumkhat rihlohna chhan bul ber chu kan hnam nihna (national identity)-ah kan chian loh vang a ni" a ti.
Rev. Dr. Zaichhawna chuan "kan hnam nihna (national identity) nia kan lo hriat - Chin, Kuki, Lushai tih te hi Kawl, Sap leh Bengali ten min koh dan mai a ni" tiin, "chi bing kan sawi - Mizo, Lai, Mara, Hmar, Kuki, Zomi, Hakha, Falam, Hualngo leh a dang tam tak hi kan hnam pum huapzo a ni lo, kan zavai hian kan pu Zova thlah kal zelte kan nih avangin Zofate vek kan ni" a ti bawk.
He inkhawmpui hi Mafeli Hlawndo leh Rebecca Mawii ten an kaihhruai a. Zofa tawng hrang hrang hmang zaithiam te zaiin, hun hlimawm tak an hmangho a ni.#zabilianz #zabilianznews #zofatehuapzo
0 Comments