MNF-in kum 2018 MLA inthlan dawna mipui laka an thu tiam tam tak tun thlengin an la tihhlawhtling lo. :Congress Thupuangtu
Vawiin khan Aizawl Press Club-ah thuthar thehdarhtute kawmin Congress party thupuangtu chuan August ni 20, 2018-ah MNF President Zoramthanga'n an party Pisa Mizo Hnam Run ah sorkarna an chan hunah chuan Mizoramin vai buhfai kan rin tawh loh tur thu leh Mizo buh kan rin zawk tur thu a sawi nia sawiin, "Vawiin thlengin Mizoram mipui ten vai buh la ringin sorkar pawhin ration atan vai buhfai a la supply ta zel a ni" a ti.
October ni 17, 2018-a Aizawl East-II MNF Workers’Meet-ah MNF President Zoramthanga’n sorkarna an chan chuan Aizawl khawpui chu motor parking-a harsatna awm lo, traffic jam awmlohna state capital (khawpui) awm chhuna an siam tur thu a sawi tih Congress thupuangtu chuan sawiin, hei pawh hi tun thlengin a la hlawhtlinglo tih a sawi a. "Nuai sang chuang an sen ral tawhna PAHOSS lah chu sorkar tan hmuhlet tur a awm miah lo" a ti.
Congress thupuangtu chuan "Traffic jam awmlohna siam chu sawiloh, Dr. R. Lalthangliana department enkawl damdawi in pawh ring zo lova Private hospital-a MRI ti tura a panna lamah amahin nasa takin Traffic Jam a siam zawk" a ti bawk.
Dr Lallianchhunga chuan MNF sorkarin an sorkar tawp kum an hmang mek chungin kawng chhawng siamna tur DPR pawh an lo la siam lo tih February 27, 2023-a Assembly zawhna leh chhanna atangin a lang niin a sawi a. "Kawng chhawng siam hi kum 2018 inthlan dawn khan Zonet-in inthlanpui thlirlawknaa MNF President an kawmnaah MNF President Zoramthanga chuan a sawi niin a sawi.
June 6, 2013 ah daih tawh pawh Aizawl South-II MNF block conference, Kulikawn YMA hall-a neih a hmanpuinaah MNF President Zoramthanga chuan kawng chhawng siam chu a sawi tawh niin Congress thupuangtu chuan a sawi a. "Hemi tum pawh hian kawng chhawng siam chu an ngaipawimawh hle tih sawiin, Kulikawn aṭanga Chanmari inkar chu target hmasak an tum thu a sawi a, hemi atan hian sum lakchhuahna tur central plan fund a tam zia leh project siama thawk peih leh taimate tan sum hâi chhuah tur a tam zia a hriat chian thu te a sawi a ni" a ti bawk.
Congress thupuangtu chuan "MNF-in an flagship programme SEDP-ah Rs. nuai 3 pek mipui min tiam a, Rs. nuai 3 sem tura an inzawrh avang hian kum 2018-ah hneh taka thlan tlin an ni a, NLUP dawng tawh zawng zawng pawhin in dawng vek ang..” ti hialin MNF President Zoramthanga’n a sawi chiang a. Hemi a sawi lai ngei pawh hi video-a hmuh theihin a la awm" tiin, "Heti chung hian kum 5 chhungin chhungkaw 60,000 tan Rs. 50,000 chauh an ruahman a, hei pawh hi tumhnih, Rs.25,000 ve ve in an pe thei tawk tawk a ni" a ti.
"Ram mipui an zah loh na leh an pawisak loh zia thlir hian Mizoramin anmahni avanga harsatna kan tawh zel lohna tur leh kan ram, kan hnam, kan sakhua a him zel nan Central-a BJP sorkar thawhpuitu MNF sorkar hi hnawl turin Mizoram mipui kan sawmin kan ngen a ni" Congress thupuangtu chuan a ti bawk.
Comments
Post a Comment