ZPM chhungkuaah Pu Sapa lamtang leh Pu Duha lamtang an awm hi thil chiang a ni :MPCC President

#ZabilianZ June 13, 2026: MPCC President Lal Thanzara'n "ZPM chhungkuaah Pu Sapa lamtang leh Pu Duha lamtang an awm hi thil chiang a ni" a ti.

Mamit, Dampa leh Hachhek bial a tlawhnaah he thu hi vawiin khan Hachhek biala Kawrtethawveng khuaah MPCC President chuan a sawi a. ZPM chhungkuaa pawl pahnih awm chu thil chiang niin a sawi.

Congress a sorkar leha, mipui nawlpui ten leirem an rah leh theihna tura NLUP changtlung zawk kalpui tura theihtawp chhuah turin MPCC President chuan an party mi te a sawm a. "Sorkar mek hian belhchian an dawl mawlh lo" a ti bawk.#zabilianznews

MNF leh ZPM chu Kristian nuaichimiha chanchintha dodala, India danpuia sakhaw zalenna paih duhtute nen puan inzarzawm nia sawiin, ni za inhlawhna pawh BJP-in vai Pathian lam tel ngei ngaiin VB-G RAM G tiin an thlak niin Lal Thanzara chuan a sawi a. Hei hi Kristianna pawlhdalna tura chetlakna niin a sawi.

MPCC President chuan "Pathianni kan serh namnulin Central hotu lawk ten Pathianni kherah Mizoram an rawn tlawh" tiin, "tunhnai lawkah pawh Central minister a lo kal a, kan CM chuan Lengpui airport-ah Hindu pathian betu dawngsawngin kohhran Upa ber inkhawm lovin a kal" a ti a. "BJP hian foreign atanga tanpuina dawn dan te tidanglamin harsatna an siam nasa a, ramdang atanga tanpuina dawnga kalpui nau hnuchham in te, rualbanlo enkawlna leh kohhran school te harsatna an siamsak mek" a ti bawk.#zabilianznews

ZPM party chu an campaign laia an tiam zawng zawng ti lo fai vek leh a letlinga kalah MPCC President chuan a puh a. Enchhin duhtu mipuite sorkar lakah an beidawng tawh nia sawiin, inchhir an tam tawh niin a sawi.

India leh Mizoram ah Congress a sorkar leh a nih loh chuan ringtu, hnam hnufual leh tlang mi te tan beisei a bo nia sawiin Pu Lal Thanzara chuan "Congress hi sorkar tura kan inbuatsaih a ngai a, chuta tan chuan intlawhtawn te kan kalpui mek a ni" a ti bawk.#zabilianz #zabilianznews #zofatehuapzo