AICC President hovin MPCC hruaitu ten Mizoram inthlanpui atana inbuatsaihna an sawiho

#ZabilianZ July 04: All India Congress Committee (AICC) President Mallikarjun Kharge hovin AICC hruaitute leh Mizoram Pradesh Congress Committee (MPCC) hruaitu ten vawiin khan kumina Mizorama MLA inthlan lo awm tura ruahmanna hrang hrang te AICC Office, Delhi-ah an sawiho. 

AICC President M. Kharge chuan India rama BJP sorkarna nakuma titawp turin kumina Mizoram inthlan chu a pawimawh nia sawiin, kumina state hrang hrang inthlanna turah Congress party te chak ngei tura an beisei thu a sawi a. Mizoramah pawh chakna an chan ngei theihna tura theihtawp an chhuah tur thu a sawi. 

MPCC President Lalsawta pawhin Congress party chu Mizoramah BJP hmanrua ni thei lo party awmchhun nia sawiin, India ramah sakhaw zalenna tundin a nih zel theihna turin Mizoram mipui ten Congress sorkar an nghakhlel hle niin a sawi.

Mizoramah kum 5 chhung MNF-in rorelna an chan chhungin economy a tlahniama, sum dinhmun a chhe hle a, mipui an mangang niin Lalsawta chuan a sawi a. ZPM pawh anmahni leh anmahni an intihchhiat avangin Zoram mipui ten Congress party chu sorkar turin an beisei sang hle niin a sawi bawk. 

Rahul Gandhi pawhin North East state zingah Mizoram chu Congress party ṭhatna ber nia sawiin, kum 2024-a India ram inthlanpui lo awm turah Congress party-in sorkarna a chan theihna tura a hmahruaitu atan Mizoram inthlan chu a pawimawh thu a sawi. 

AICC President hova thutkhawmah hian MPCC aṭangin President Lalsawta bakah Treasurer Dr. Lalmalsawma, Spokesperson Dr. Lallianchhunga, General Secretary CS Thanga, Mahila President Vanlalawmpuii Chawngthu leh MPYCC President Laltawnliana Sailo te an tel a ni.