Lok Sabha MP C. Lalrosanga hova Mamit district development coordination & monitoring committee (DISHA) thutkhawm vawiina neiha tarlan a nih danin, sorkar kum kal mek 2023-24 ah Reiek leh Zawlnuam RD block-ah ni 14 inhlawhna siam tawh niin, W. Phaileng RD block-ah ni 15 leh Kawrtethawveng RD block-ah ni 13 inhlawhna siam a ni tawh a. Mamit district-ah hian Job card 22340 a awm mek.
Mamit district-ah hian Jal Jeevan Mission (JJM) hnuaiah khaw 91-a chhungkaw 18171 te tui connection pek an ni tawh a. Mamit WATSAN division chu hlawhtlinna hmu chak ber leh hma la tha pahnihna atana thlan a nih thu sorkar thuchhuah chuan a tarlang.
Sorkar kum kal mekah PMGSY PWD Mamit Division hnuaiah Phuldungsei - Parvatui kawng 100% target-ah 75% thawh tawh a ni a. Tuipuibari - Andermanik road 95% thawh tawh niin, Andermanik - N. Belkhai road 40% thawh tawh a nih thu tarlan a ni bawk.
National Health Mission (NHM) Mamit District hnuaiah khaw 90-a mi 100867 tuam mek a nih thu tarlan niin, tunhnaiah mihring awm zat atanga teha thi tlem ber niin, Health Minister Award an dawn thu tarlan a ni.
Samagra Shiksha Mamit district-a school pariat-ah Vocational Education kalpui mek a nih thu leh PMUY hnuaiah LPG connection 5840 pek a nih tawh thu tarlan a ni bawk.
0 Comments