Assembly House hrul bazar leh a bulhnai kawngkama thil zuar te AMC Multi Complex sawn dawn

#ZabilianZ July 06: Mizoram State Assembly House hrul Bazar-a chawhmeh/sa leh thil dang zuar te leh Treasury square bus stand bulhnai kawngkama thil zuar (hawker) te chu AMC Multi Complex, Tuikual South-ah suanluh tum an ni. 

Aizawl Municipal Corporation (AMC)-in Tuikual South-a Rs. vbc 10.59 senga a sak AMC Multi Complex building hi kumin February ni 10-a hawn tum kha ni mahse, a awmna Tuikual South veng mipuiin hawn an remtih loh avanga thulh a nih hnuah nimin khan Aizawl Mayor Lalrinenga Sailo-in a hawng ta a ni. 

Municipal Commissioner Er. Lalhriatpuia'n building sak leh hawn kawngah harsatna hrang hrang paltlang a nih thu a sawi a. Inphahhniamna nen indawr a nih hnuah harsatna hrang hrang te chinfel a nih thu a sawi. 

Aizawl Mayor Lalrinenga Sailo chuan Tuikual South-a AMC Multi Complex chu a satu contractor-in tha taka a sa nia an hriat thu a sawi a. A enkawl zui kawngah AMC bakah a awmna veng Tuikual South mipuite an pawimawh tur thu a sawi.

AMC Multi Complex chu mi tam tak tana malsawmna thlentu, eizawnna tam tak siam tura ruahman a nih thu Aizawl Mayor chuan a sawi a. Lirthei parking, Bazar leh dawr te bakah a chung bera Hall awm chu a hmang duh apiangin man chawia an hman theih tur a nih thu sawiin, Mizoram rorelna inpui Assembly House hrul bazar leh a bulhnai kawngkama thil zuar te pawh sawnluh tura ruahman a nih thu a sawi bawk.

Technical report-a a lan danin, UT Building ni thin, hlui tawh tak chu AMC-in sorkar-ah dilin, phalna an neih hnuah thiatin AMRUT fund Rs. nuai 296 hmangin parking lot sak tan a ni a, AMC fund hmanga chhunzawm chhoh a ni. August 18, 2017-ah sak tan niin, March 13, 2023 ah zawhfel a nih thu technical report-ah chuan tarlan a ni bawk a ni.