Mizo hnam leh khawtlang inrelbawlnaah pawl pawimawh em em pathum - YMA, MUP leh MHIP an awm :Lalruatkima

#ZabilianZ July 06: Aizawl West II bialtu MLA, Minster ni bawk Lalruatkima'n "Mizo hnam leh khawtlang inrelbawlnaah pawl pawimawh em em pathum an awm a - YMA, MUP leh MHIP te an ni" a ti a. Aia upate zah leh Zonun zemawi dang chhawmnun zel kawngah heng pawl 3-te hi an pawimawh hle tih a sawi.

A biala veng pathum - Kanan, Tuikual South leh Dinthar Venga MHIP Day a hmanpuinaah heng thu te hi vawiin khan Lalruatkima chuan a sawi a. Zonun zemawi chhawmnun kawngah chhungkaw nu ber te awmna MHIP an pawmawh leh zual tih sawiin, an tu leh fate zirtir leh zilh kawngah nasa lehzuala hma la turin a chah.

Fa neih tam inzirtir tula a hriat thu sawiin, Lalruatkima chuan nikum lama inchhiarnaah kohhran pakhatah phei chuan nau thar piang 18 chauh an nei niin a sawi a. "Fa neih tlem aiin fa neih tam hi inzirtir thar a ngai hialin ka hria" a ti.

Ramdang ten Mizoram leh hnam hi engtinnge min hmuh tih ngaihtuah tur a nih thu pawh sawiin, Mizote hnam huaisen, tlawmngai leh taima hmuha an hmuh zelna tur chuan thawhhona tha leh tanrual zel a pawimawh thu a sawi bawk. 

Kum 1974-a din MHIP hmalakna avangin tunah chuan Mizo hmeichhiate chu khawvel zau zawka hmeichhe dangte nena khaikhin pawhin an duai tawh lo hle niin Minister Lalruatkima chuan a sawi a. MHIP-in hmeichhe chanvo humhalh leh chawisan kawnga an hmalakna avangin India President atangin chawimawina sang ‘Nari Shakti Purushkar’ hial an dawng tawh tih sawiin, lawmawm a tih thu a sawi. 

Inneih, inthen leh ro khawm kawnga Mizo hmeichhe dinhmun tha tawk lo pawh MHIP hmalakna avangin tunah chuan an dinhmun a tha ta hle tih Lalruatkima chuan a sawi a. MHIP Kanan branch hnenah ei leh in senso atan Rs.20,000 pein, MHIP Run sak zawmna atan MLA fund atangin Rs. nuai 2 a pe a. MHIP Tuikual South branch hnenah ei leh in senso atan Rs.20,000 leh MHIP Run sak nan MLA fund atangin Rs. nuai 3 a pe bawk a ni.