Dan kalha Sava lakluh phurtu Central Jail-ah dah - July 14-ah Court-ah inlan leh ang

 #ZabilianZ July 03: July ni 1, 2023-a man dan kalha ram dang atanga lakluh Sava chi hrang hrang 8 phurtu F. Lalchhuanawma, Melbuk School Veng, Champhai district chu Central Jail-ah dahluh a ni a, July ni 14, 2023-ah Court-a inlan leh tura tih a ni.

Ramchhunga awm lo (exotic species an tih), dan kalha lakluh Sava 8 te hi July ni 1, 2023 (Inrinni) khan Seling YMA CADS (Central anti-Drugs Squad) duty-te puihnaa man a ni a. Sava 8 phurtu F. Lalchhuanawma chu Court-a hruai a nih hnuah Central Jail-a dahluh niin, Sava a phurhna lirthei (Hyundai Venue), MZ 04 A 5716 pawh hrensak a ni a, a Sava phurh te chu Court remtihnain Aizawl Sahuan-ah dah an ni thung.

Tuntuma dan kalha lakluh Sava man hi Mizoramah Wildlife (Protection) Amendment Act, 2022 hman a nih hnua case awm hmasaber a nih thu EF&CC department chuan an sawi a. He dan hi a khirhin, hremna pawh a na hle niin an sawi bawk.