Christina Roluahpuii Sailo chuan ward fund hman a nih dan a tarlanna lehkhaa-ah chuan an ward tana sum lo kal te mipuiin an hriatpui ve vek a duh thu tarlangin, "kan ward tana sum lo kal hi ka ta ni lovin, kan ward ta a nih avangin ward tana sum lo kal hmanna ward mipuite hrilhhriat hi ka tih makmawhah ka ngai," tiin a tarlang.
Property tax return hmanna tur chu danin a phut angin ward committee-ah sawiho thin a nih thu sawiin, Christina Roluahpuii Sailo chuan "Danin phut chiah lo mahse, tha zawka hman a nih theihna turin general ward fund hmanna tur pawh ward committee-ah pharha sawiho thin a ni" a ti a. Ward committee chu special meeting tel lovin vawi 9 an thutkhawm tawh thu a tarlang bawk.
Christina Roluahpuii Sailo chuan a thiam leh phak tawka an ward hmasawnna atana hma a lak thin thu pawh sawiin, "Min duhkhawpin ka ring hauh lo, kei ngei pawh ka induhkhawp lo. Ka tlin loh leh fellohna tam tak in hria ang tih ka chiang a, chungahte chuan hnunglam atanga min sawisel mai lova, min finchhuaha, a tul chuan min hau bawrh bawrh turin ward mipuite ka sawm che u,' tiin a tarlang.
Corporator atana thlan tlin a nih hnuah sorkar kum hnih a vei tawh a, sorkar kum tharah a kum liamtaa ward fund hmannate ward mipui hnenah a sem ve ve a ni.
0 Comments