Hna hrang hrang thawk tur te dan ang thlapa lak an ni :Assembly Secretariat

 #ZabilianZ July 05: Mizoram Legislative Assembly Secretariat hnalaka thil fel tawk lo a awm nia sawi chungchangah Assembly Secretariat chuan dan ang thlapa engkim kalpui a nih thu an sawi.

Legislative Assembly Secretariat chuan tunhnaia hna lak te chu dan ang thlapa lak nia sawiin, exam mark leh answer paper te pawh a duh tan RTI hmanga dil theih reng a nih thu a sawi a. "Appointment hi cancel leh a nih chuan dan ang thlapa lak an nih avangin Court-ah kal se Secretariat lam hian kan hneh dawn lova, cancel leh chi ah kan ngai lo" an ti. 

Tunhnaia Mizoram Legislative Assembly Secretariat a hna hrang hrang - Assistant, Translator, UDC leh LDC laknaah thil fello a awm lo nia sawiin, dan angin chanchinbu pahnih - Mizo Aw leh Dingdi-ah te ni 25 & 26.1.2023-ah advertisement chhuah a nih thu leh form thehluh hun tawp atan ni 24.2.2023 ruat a nih thu an sawi. 

LDC bik chu post 8 ruak mahse, sum inrenchemna avangin a tirah post 5 lak tura tih ni mahse, sum dinhmun a ziaawm chhoh avang leh Assembly committee hrang hrang te an active chhoh tak avangin post 8 lak tura tih a nih leh thu an sawi a. Ni 22.2.2023 ah Mizo Aw leh Dingdi chanchinbuah te bawk advertisement pawh chhuah leh a nih thu leh dilna thehluh theih hun pawh 20.3.2023 thleng pawhsei a nih thu an sawi. 

Post 8 lakna tur atana application thehluh hun tawp chhuah a tlai tak deuh chhan sawifiahin, Assembly Secretariat chuan Budget Session-in a nan vang niin an sawi a. Advertisement chhuah nawn leh tlai ta hret mahse, dilna thehlut mi 2369 lai an awm tho niin an sawi. 

Assembly Secretariat chuan Translator hna dilna form la chhuak 827-ah  mi 159 an exam thu an sawi a, Assistant hna dilna form la chhuak 2540-ah 453 an exam-a, UDC hna dilna form la chhuak 1610-ah 310 exam-in, LDC dilna form la chhuak 3055-ah mi 712 an exam niin an sawi bawk.

Assembly Secretariat hna lakah hian thil fel tawklo a awm nia hriain zirlai pawl pahnih MZP leh MSU chuan thil diklo awm te siamtha turin hma an la a. Hna lakna order chu tun thla ni 6 (naktuk) ral hmaa sut leh an phut a ni.