#ZabilianZ July 04: Chief Minister Zoramthanga'n Manipur tualchhung buaina tuartu zingah a chipui Zo hnam tam tak an tel thu leh a chipuite tawrhna chu a tawrhna a nih miau avanga a ngawihsan theih loh thu tukin khan saptawngin Twitter kaltlangin a sawi.
Mizoram Chief Minister chuan Manipur buainaah mi tam takin nunna an chan tawh thu te, thisen tam tak a luanral tawh thu te sawiin, nunna chan leh hliam tuar te, in leh lo chan te a tawrhpui thu a sawi a. "May thla tira Manipur-a buaina chhuak chu tukin July ni 4, 2023, dar 3:30 thleng hian a la reh lo, ni 62-na a ni ta! Buaina a ziaawm zel kan beisei laiin a punlun ta zawk a, a reh hun tur hriatthiam harsa tak a ni tawh!" a ti.
Sakhaw hmun serh Biak In hal leh khawih chhiatte, tualthahna leh buaina nghawng tawrhna rapthlak tak tak thlalak leh video te hmuh belh tur awm tawh lo se a duh thu Zoramthanga chuan tarlangin, buaina chinfel dan kawng khat chauh a awm a nih pawhin chingfel tura hma lak nghal ni se a duh thu a sawi a. "Sahimna zawnga hmun dang pan mi tam tak an awm belh zel bawk a, chung zingah chuan ka chipui Zo-hnahthlak tam tak an tel a, kan chipuite tawrhna chu kan tawrhna a nih miau avangin ngawihsan theih a ni lo!" a ti.
Mizoram Chief Minister chuan nunna a hlut thu leh a tuartu tana na tak a nih thu sawiin, "Nunrawng taka nunna inlaksak leh insawisakna thleng phei hi chu a demawm lehzual" a ti a. A tuartu ni lo tan pawh mihring mihrinna thinlung aṭang pawhin nunna inlaksak chu hriatthiam harsa tak a nih thu a sawi.
Buaina chinfel dan kawng awm apiang dapa, a rang thei ang bera ngaihtuah a ngai takzet tawh tih sawiin, Zoramthanga chuan "Loh theih lohva mawhphurtute tan tun hi chet hun ṭha ber a ni ang. He buaina rapthlak tak hi lo tawp tawh se ka duh takzet a, buaina chinfel dan kawng rang taka ngaihtuah leh chet lak nghal hi mawhphurhna la ngei ngei tura ngaihte mawhphurhna leh an tihmakmawh a ni a. Remna leh muanna a awm thuai nan kawng zawn nghal ni se ka duh a ni" a ti.
Manipur buaina avanga sahimna zawng Mizorama tlan lut sorkar chhinchhiah danin mi 12000 chuang an nih tawh thu Chief Minister Zoramthanga chuan sawiin, Manipur, Myanmar leh Bangladesh aṭanga sahimna zawnga Mizorama tlanlut, Mizoram sorkarin a lo tuamhlawm leh enkawl mi 50000 chuang an nih mek thu sawiin, "heng mi te enkawlna leh chhawmdawlna tur central sorkar aṭanga puihna kan dil pawh hi a rang lama pek kan nih thuai ka beisei tlat a ni" a ti bawk.
0 Comments