MKHC-in UCC hman tumna thulh leh tura ngenna Law Commission-ah thawn
MKHC chuan Law Commission of India-in UCC chungchanga mipui hriattirna a tihchhuah chungchangah Mizoram bikah chuan thutlukna siam tura an inngaih thu sawiin, UCC kalpui tumna chu thulh leh turin an ngen a ni.
Mizoram bik chu India sorkar nena inremna (Peace Accord) angin Mizo nunphung leh sakhuanaah te, Mizo hnam dan (customary law) nghawng thil thutlukna siam ngaiah te India Parliament chu a inrawlh a thian loh thu MKHC chuan an lehkhaah chuan an tarlang a. Mizorama in hmun/ram inhlanchhawn leh neitu nihna thu ah pawh Mizoram Legislative Assembly thutlukna a nih loh chuan Parliament thutluknain nghawng a neih ve theih loh thu an tarlang.
UCC pawh Mizoram Legislative Assembly-in a pawm chauhin Mizoramah hman theih a nih avangin, UCC chu Mizoramah chuan hman theih loh tura an ngaih thu an tarlang a. UCC chu an zirchian thu leh hnam hrang hrang tih dan leh sakhaw hrang hrang dan te a nghawng dawn avangin India ram inpumkhatna tichhe thei tur nia an ngaih thu pawh tarlangin, hnam leh sakhaw tlem zawk te nekchepna leh chimral tumna a nih theih avangin MKHC chuan an duh lova, hman tuma hmalakna pawh an dem tih an lehkhaah chuan an tarlang bawk.
Comments
Post a Comment