Rangvamual leh Phunchawnga dan phalloh hmanga eizawngte chhanchhuah dan tur ngaihtuah

#ZabilianZ July 20: Core Committee: Mission Chhanchhuahna chu nimin khan Aizawl District Bawrhsap Dr Lalhriatzuali Ralte hovin Rangvamual Local council house-ah an thukhawm a. 'Mission Chhanchhuahna' hi Rangvamual leh Phunchawng venga eizawnna mumal neilo, zu zuar leh dan in a phalloh hmanga eizawngte chhanchhuahna tura ruahman a ni. 

Senior Social Scientist Debashish Mukherjee leh a team ten an zirchian hnuah danin a khap thil hmanga eizawng te chu sorkar department hrang hrang scheme, loan leh service dang te hmanga an eizawnna thlak tura tangho tura ruahmanna siamin, hma la turin Core Committee leh Working Committee din a ni a. He mission atan hian Planning&Programme Implementation deptt. atangin SEDP hnuaiah sum ruahman a ni. 

Bawrhsap hova thutkhawmah hian Rangvamual leh Phunchawng Local council, YMA leh Kohhran hruaitu ten an vengchhung harsatna hrang hrang - hriselna leh zirna lama an tlakhniam chhan nia an hriat te leh thil dang dang te an sawi a. Department hrang hrang official ten an department hmalakna, schemes, loan, training an pek theih te an sawi bawk. 

Core committee chuan an enpuina hnuaiah Rangvamual leh Phunchawng Local council te remruat angin Gram Sabha koh ni se, an ti a. Deptt. hrang hrangin remchang hmasaberah mipui tan Help Desk siamin, sorkar scheme leh training, loan - eizawnna atana an hman theih hrang hrang te hrilhhriatna hun buatsaih ni se, an ti a ni.