#ZabilianZ July 04: LPS Special Report buatsaih thintu Vanneihthanga Vanchhawng-in "Social media hi midang tihchhiatna hmanruaa chantir lovin, he hmanraw chak tak hi midang dawmkanga, zirtirna tha petu, midang khaichhuahna hmanrua atan hman a tul", a ti.
MPCC social media department-in social media hman kawnga inzirtirna vawiina an buatsaihah 'resource person' niin he thu hi Resource Person Vanneihthanga Vanchhawng chuan a sawi a. Social media-in chhungkaw tin a luhchilh tawhna khawvelah social media chakna chu Mizoram leh Mizo hnam tan hmanraw tangkaia chantir a tul thu a sawi.
Social media chu awlsam zawkna leh hahdam zawkna atana hmanraw tangkai leh tha tak a nih theih rualin, mi tam takin buaina leh harsatna, mualphona an tawh phah thu leh pawi a tih thu Vanneihthanga chuan a sawi a. A tha zawnga hmasawnna atan, mahni leh midangte ah pawh a tha zawnga nghawng a neih theihna tur zawnga hman dan zir a pawimawh thu a sawi bawk.
Congress party zawm thar Lalnunmawia Chuaungo pawhin thusawiin, Congress party mi te chu social media avanga ram leh hnam, nitin khawsak hona kawnga inhmelmakna siam thei lakah inthiarfihlim tur an nih thu a sawi a. Congress party zawm thar bawk Lalremruata Renthlei pawhin social media a tha zawnga tangkai taka hmang tur chuan Bible chhiar tam a pawimawh ber nia sawiin, "Bible-in medfia hrang hrang te hi fel fai leh fiah taka khaikhawmin a kalphung a lo hrilhfiah sa vek a ni", a ti.
AMC Corpoarator Rosiamngheta pawhin thusawiin, "media chakna chu midang tihchhiatna tur hmanrua ni lovin ram leh hnam tana tha a ni tur a ni", a ti a. Rilru dik pu chunga social media hman a tul thu a sawi ve bawk a ni.
0 Comments