Mizoram MP te lo haw - chawimawina thilpek hlan an ni

#ZabilianZ Aug 12: Mizoram MP pahnih - Lok Shaba MP C Lalrosanga leh Rajya Sabha MP K. Vanlavena te chu vawiin khan Delhi atangin an lo haw a. Lengpui Airport-a anmahni lawmna hun tawi buatsaihah Lok Sabha MP C Lalrosanga'n "Congress kan support vang ni lovin Manipur-a kan unaute kan thlawp avang zawkin an motion putluh kha kan lo tawmpui" a ti. 

C. Lalrosanga chuan tuntum Parliament thutkhawm chu an urlawk nasa hle nia sawiin, "khulam hotu ten Manipur chungchang sawi chhuah an khap avangin tum angin sawichhuahna hun min siamsak duh ta lo" a ti a. Sorkar rintawklohna chungchanga thusawi a dilna phalsak a nih loh thu sawiin, "Manipur MP pahnihte pawh hun pek an ni lova, kan unaute tihduhdahna hmun Manipur sorkar hi awm tawh lo se, tih hi kan duh dan a ni" a ti. 

"Kan unaute thlavang hauh kawngah Mizoram mipui ten min thlawp avangin huaisen takin kan awm a, kan tih theih china kan tih tur chu Mizoram tan kan ti zel dawn" C Lalrosanga chuan a ti bawk. 

Rajya Sabha MP K. Vanlalvena pawhin "tuntum session chu kan CM berin a tawp thlenga NDA do tura thu min chah avang leh Manipur issue hi thil thleng satliah ni lovin, tum lawk sa veka thil thleng nia kan hriat avangin na takin kan do a ni" a ti a. 

Forest Conservation bill chungchang sawiin, Manipur chungchang avangin opposition MP zawng zawng an chhuak vek tih a sawi a. He bill hi a ni pawhin pass a duh loh avangin a chhuak ve nia sawiin, "Forest conservation bill chu opposition zingah pawh dodal tum an awm lo, Rajya Sabha MP zingah keimah chauhin ka dodal" a ti bawk. 

Rajya Sabha MP K Vanlalvena hi MZP-a a thawhpui thin ten Aizawl Press Club-ah lo hmuakin chawimawina thuziak te an hlan a. Lok Sabha MP C Lalrosanga pawh a chenna veng Tuikual North Local Council leh MNF Unit ten a chenna in-ah lo hmuakin Manipur Zofate thlavang na taka a hauh avangin Tawlhloh puan leh Thangchhuah diar an lo hlan bawk a ni.