Mizoramah zirtirtu post ruak hnawhkhah loh 3000 chuang a awm tawh a, a nghet leh nghet lova lak 2700 vel an awm tawh :Education Minister

#ZabilianZ Aug 11: School Education Minister Lalchhandama Ralte-in Mizoram pumah zirtirtu post ruak hnawhkhah loh 3000 chuang a awm tawh nia sawiin, SEDP teacher leh MR teacher te lak an nih thu leh a nghet leh nghet lova lak 2700 vel an awm tawh niin a sawi. 

Ngopa-a Sub-Divisional Education Officer Office vawiina a hawnnaah he thu hi School Education Minister chuan a sawi a.  Mizorama zirna syllabus chu hmundang nena khaikhinin a hniam bik lo nia sawiin, "all India standard a ni a, zirtirtute pawh training pek țhin an nih bakah lak thar te pawh qualified trained vek an ni" a ti.

School Education Minister chuan "Mizoram sorkarin zirna a ngai pawimawh a, a arkhawthim dai lo, awmze nei takin a kalpui" a ti a. "He ram leh hnam hian nihphung identity a nei a, chu chu zirlaite thinlungah tuh zel tum a nih avangin 'Zonun' tih chu zirlaibuah pawh hman thar a ni" a ti bawk.

Bialtu MLA, HRD Board Vice Chairman ni bawk Dr L. Thangmawia pawhin Ngopa-ah SDEO an nei ta chu lawmawm a tih thu a sawi a. Sorkar hmasain tihlawhtling hman lo mahse, hma an lo laknaah lawmthu sawiin, zirna lama thawktute tan hmun danga office dawr tura kal ngai lova, mahni khuaa chinfel theih a ni dawn ta chu lawmawm a tih thu a sawi.  

School Education Minister chuan vawiin vek khan Govt. Saitual Higher Secondary School Commerce leh Science building sak thar leh hmeichhe hostel, zirlai 30 awm theihna tur Netaji Subhas Chandra Bose Avasiya Vidyalaya a hawng bawk a ni.