ZPM kalphung thar zawrh hi innghahna tlak a nih loh zia an party chhungah ngei a lang mek :L. Thangmawia

#ZabilianZ Aug 07: MNF thalai President Dr L Thangmawia'n ZPM party-in kalphung thar an zawrh chu innghahna tlak a nih loh zia ZPM party chhungah ngei a lang mek niin a sawi. 

MNF party chhung inkhawm, MNF Hnam Run-a neihah vawiin khan he thu hi MNF thalai President chuan a sawi a. ZPM party chu "Lunglei Municipal Council (LMC) leh VC bye election-a hnehna an chan hnu ah sorkar tur thawka thawin, hun rei tak midang tlinlohna aupui hnapui bera an lo neih tawh chu a rah an seng a, an hlim nui ri pawh a reh fel hmain midang aia tha bik anga an infakmawi chawpna chu anmahni chhungkua ngei atangin an lo nih bik loh zia a takin a lang chho ta mek a ni" a ti. 

MLA candidate siam pawh inkhualtelemna atana hmangah MNF thalai President chuan ZPM party chu a puh a. "Thla thum em pawh an committee sang thutlukna vawnghim thei lo hian kan ram tana mipui hnena an intiamnate hi kum khat chhung an vawnhim theih mi tam takin an ring tawh lo a ni" a ti. 

Mizoram political history-ah hetiang em em a party thuneitu sang, PAC member ni pha chin ngat leh hruaitu lawk chin ten MLA inthlan kuma an party an bansan tam leh Elected OB ngei ten an party show cause notice an pek hi a la awm ngai lo va, hei hi kalphung thar a nih chuan MNF chuan kan tlin ve ngai dawn lo a ni, a ti a.

MNF Thalai President chuan, Mizoram politics dinhmun enin Congress leh ZPM chu sorkarna siam tura an la inpeih loh zia mipuiin an hmu chho mek niin a sawi a. MNF-in sorkarna an siam leh ngei dawn tih chu a ni telin a lang chiang chho zel niin a sawi. 

Sorkar term kal mek chhunga inthlan awm zawng zawng atanga zaa 80 chuangah Zoram mipuiin MNF sorkar an rintawk zia an vote hmangin an tilang tawh nia sawiin L Thangmawia chuan "Zoram mipui chungah pawh lawmthu kan sawi a ni" a ti a. "Hei hi chapopui tur lam ni lovin ram leh hnam tana nasa zawka thawk tura ke kan pen a tul zia tilangtu zawk a ni" a ti bawk.