Congress party-in Sikul awm tawh lo sorkar tanpuina dawng tura pawmna sut leh phut

#ZabilianZ Sept. 30: Congress party-in Council of Minister thukhawmin grant in aid pek tura a pawm school zingah a taka school awm tawh lo Zasai Memorial HS, Siaha a tel niin an sawi.

Mizoram pradesh Congress committee (MPCC) Media Chairman Lalremruata Renthlei-in vawiin khan Aizawl Press Club-ah thuthar thehdarhtute kawmin he thu hi a sawi a. Zasai Memorial HS, Siaha chu MLA inthlan lo awm tura MNF MLA candidate tur Lalmalsawma Zasai pa hriatrengna atana din, kum tam kal tawha tihtawp leh tak nia sawiin, a building pawh mimalin chenna atan an luah tawh niin a sawi.

Mizorama mimal, khawtlang leh kohhran school tam takin sorkar tanpuina an dawn ve theih loh laia school awm tawh lo sorkar tanpuina dawng tura thlan a ni chu sut leh tur leh school awm tawh lovin sorkar tanpuina a dawn theihna tura thil diklo titute chhui chhuak a, dan hmanga an phu tawk hremna pe ngei tura an phut thu Lalremruata Renthlei chuan a sawi.

MPCC Media Chairman chuan Zasaia Memorial School chuan tihtawp a nih hnu ah sorkar atangin tanpuina a lo dawng tawh em, tih chu an zawhna a nih thu a sawi a. High School bik te tana tanpuina sorkar-in kumkhata Rs nuai 2.5 a pek thin an dawng tawh em, school awm tawh lo a ni tih engtin nge School Education department-in a hriatloh theih, engvangin nge tanpuina sum school awm tawh bawk si lo chu a pek a nih, tih te chu an zawhna a nih thu a sawi bawk.

Education department hnuaia Samagra hnuaia thawk te dinhmun siamthat tumna sorkarin a nei em, tih pawh an zawhna a nih thu MPCC Media Chairman chuan a sawi a. "Samagra hnuaia thawk te chu Education-a a foundation pawimawh ber an ni a, an post-ah an awm tha a, hna an thawk tha a, an dinhmun siamthat sorkarin a ngaihtuah em tih kan zawt a ni" a ti bawk.