Lengteng bial leh SRDC area-a zirlai tithate lawmpuina leh tanpuina hlan

#ZabilianZ Oct 7: Vawiin khan Lengteng bial atanga HSLC distinction-a pass zirlai 8 te hnenah Smartphone leh HSSLC distinction-a pass zirlai 2 hnenah Laptop pek an ni a. First division-a pass, chhungkaw harsaa zirlai 23 leh Sialkal Range Development Council (SRDC) huam chhunga zirlai 22 te tanpuina sum hlan an ni bawk.

Lengteng bial leh SRDC area-a zirlaite hnena thilpek hlanna hun Mizoram State Archive Conference Hall, Aizawla neih hi Pachhunga University College Principal Prof. H. Lalthanzara'n a hmanpui a. Board leh University mark te pawimawh viau mahse, zirlaite thluaka thiamna zawk a pawimawh tial tial nia sawiin, college-a thawk tur laknaah pawh mark aiin an thiamna zawk en thin a nih thu a sawi.

Lengteng bialtu MLA, SRDC Chairman ni bawk Dr L. Thangmawia pawhin zirlai lawmpuina leh tanpuina dawng te a lawmpui thu sawiin, a bial chhunga zirlai ten zirna kawnga inelna thianghlim an neih beiseia Smartphone leh Laptop chu distinction-a pass chin te pek thin an nih thu a sawi a. Zirlai thiam thei, chhungkaw harsa si te khaichhuahna atana – admission fee, uniform leh lehkhabu man daih tura ngaih tanpuina pek thin an nih thu a sawi bawk.

Zirlaite lawmpuina leh tanpuina pek chu inthlan dawn kuma tih tan ni lovin kum 2019 atanga tih tan a nih tawh thu L Thangmawia chuan a sawi a. Zirlai tanpuina dawng tur chu Ngopa BDO Chairman-na hnuaiah party induhsakna awm lova committee-in a thlan thin thu a sawi.

L Thangmawia chuan MLA inthlan lo awm turah thlan tlin a nih leh chuan Lengteng biala zirna in atanga ti tha te Delhi leh India ram hmun remchangah Study tour-a tirh an nih tur thu a sawi.

Sorkar thuchhuahin a tarlan danin Lengteng biala zirlai 23 te tan Lengteng bial MLA fund Rs. 3,45,000 leh SRDC area-a zirlai 22 te tan SRDC fund Rs. 3,14,000 sem a ni.