A hlawhtling lo zawkah tang mah ila, inthlan result hi kan thatna tur zawka Pathian remruat a ni tih kan pawm :MNF President

#ZabilianZ Dec 11: MNF party President Zoramthanga'n "a hlawhtling lo zawkah tang mah ila, inthlan result hi kan thatna tur zawka Pathian remruat a ni tih kan pawm" a ti a. Kum tharah an insiamthat vek tur thu sawiin, rawtna zawng zawng pawh ngaithlak vek a nih tur thu a sawi.

MNF party chhung inkhawm vawiina neihah he thu hi MNF President Zoramthanga chuan a sawi a. "MNF party atangin MLA 10 lai Pathianin min pe hi a lawmawm hle" tiin, MLA inthlan neih zawh taka party worker te thawhrimna leh mipuite thlawpnaah lawmthu a sawi.

Zoramthanga chuan an sorkar loh avangin an zavaiin an na tih an hiat thu sawiin, "Pathian remruat dan zawh rual a ni lova, ZPM sorkar turin Pathianin rem a ruat a ni tih pawm thiam ila, Pathianin Zoram hi han enchhin ve reng reng a duh a ni", a ti a. Zoram hmun hrang hranga an party worker ten zam mai lova rilru thar nen tan an lak theuh a pawimawh thu sawiin, "chak zawkin hei aia tha hian kan kal anga, kan tho kang leh ngei dawn a ni' a ti.

MNF party an sorkar chhungin Zoram a that theih nan development tam tak an khawih niin Zoramthanga chuan a sawi a. Development tha lo emaw MLA candidate an nei tha lo emaw a nih loh thu sawiin, "Pathianin kan tana rem a ruat a ni tih kan pawm thlap a ni" a ti bawk.

MLA inthlan zawh taka Tuivawl bial atanga thlan tlin, MNF Legislature Party Leader Lalchhandama Ralte pawhin thusawiin, “Inthlanna felfai leh thianghlim tak hnuaiah MLA inthlan kan nei thei a, ka thawhpui hlawhtlinna chang zo ve lo erawh ka tawrhpui hle. Pathian zarah kan dam anga, kan tho kang leh ngei dawn a ni", a ti a. 9th Mizoram Legislative Assambly-a Zoram kal zel dan tur kan relna turah Zoram mipui leh kan hotute thlawpna kan mamawh em em dawn a, thurawn pek kan ngai dawn hle" a ti bawk a ni.