MNF in Zofa raltlan thawnkir pawi an ti, ngaihsak turin sorkar an phut

#ZabilianZ June 19: MNF party-in Bangladesh-a Zofa ten harsatna an tawh avanga Mizorama raltlana nunau 200 chuang te BSF-in an thawnkir leh nia sawiin, pawi an tih thu an sawi a. Hemi chungchangah hian Mizoram sorkar chu a ngawi nia sawiin, Zofa raltlan te ngaihsak turin Mizoram sorkar chu an phut.

MNF thuchhuahin a tarlan danin, Bangladesh-a Zofa Mizorama raltlan, BSF-in an thawnkir te chu Bangladesh-a an awmna khuaa let leh ngam tawh lovin ramhnuaiah khawchhe karah an tangkhang mek a. An zingah naupang leh kum upa thahnem tak an tel bawk. "Kan unau ten harsatna nasa tak an tawh laia Mizoram sorkar a ngawi tlat hi MNF chuan pawi a ti hle a, an sahimna zawnga rawn luh tum kan unaute hi ngaihtuah hram turin sorkar kan ngen a ni" an ti.#zabilianz

MNF sorkar laia Bangladesh atanga Zofa raltlan te chu BSF-in lo dangin harsatna nasa tak an siamsak avangin khatihlaia Chief Minister Zoramthanga khan "Kan unau te dan kan remti lo, nangni pawhin in Bengali pui Bangladesh ațanga India an rawn lut tur in dang bik lo" tiin tan a khawh niin MNF thuchhuah chuan a tarlang a. "Mizoramah thahnem tak an rawn raltlan a, chhawmdawlna pawh thahnem tak pek an ni" an ti.

Bangladesh-a Zofa ten harsatna an tawh leh mek laia Mizoram sorkar a ngawi tlat chu hriattiam har an tih thu MNF chuan an sawi a. "Zohnathlak te tuamhlawma, kuahkhawmtu an ni thei ngang lo a nih pawhin, a lengdarhtu ni lo hram turin ZPM sorkar hi MNF chuan a ngen a ni" an ti bawk.#zabilianz #zofatehuapzo