Editorial : Ram hmasawnna leh than zelna atan roreltu leh mipuite kan pawimawh ve ve

#ZabilianZ July 25: Mizoramin hruaitu ropui tak tak kan nei tawh a - Pu Ch. Chhunga, Brit. T Sailo, Pu Laldenga, Pu Lal Thanhawla leh Pu Zoramthanga te hnu ah Pu Lalduhoma a lo lang ve leh ta bawk.

Kan hruaitu neih tawh ten an phak ang tawk tawkin ram tan theihtawp an chhuah theuh a, sulhnu ropui tak tak nei, mi bik, dah hniam theih hauh loh vek an ni. Chutih rual chuan sulhnu duhthusam kim lo lai nei te an ni ve vek bawk ang.

Tuna lo lang ta, kan Chief Minister nilai Pu Lalduhoma hian zuanglawr nih a hlawh viau laiin, tum a nei a, a tumah a chiang a, a tum chu hlen theih dan kawng a zawng a, a tumruhna, a beidawn duhlohna avangin tun dinhmuh hi a thleng ta ni te pawhin a ngaih theih awm e.

A kaihhruai sorkar thar laka mipui beiseina san zia hretu vek kan ni. Amah leh a kaihhruai sorkar laka kan beiseina sang tak te a hlawhtlin theihna tur chuan mipuite pawhin tih tur kan nei ve anga, amah leh a khawnbawl te an pawimawh ang thovin an kaihhruai mipui te pawh kan pawimawh ve a ni tih kan hriat a tul ang. Kan tihsual chang ran chunga min lo thlirtu aiin kan tisual tur min venpuitu ten min tichak thin a, chu chuan thil tha zawk a hring thin bawk a nih kha.

Mipuite leh party worker te hi dik taka rorel tum te kal diklo tir palh theitu kan ni thei tih kan hriat reng a pawimawh a. Roreltute kal sual palh tur veng zawng ni lova, an tihsual chang zawnga kan kal chuan hmasawn mamawh tak ram hi a hnung tawlh chak zual sauh thin ang.

Roreltu ten an tih dik loh nia kan hriat te pawh en liam mai lo leh tihmualpho duhna rilru ni lova siamthat duhna rilru atanga a thlenna tur dika huai taka thlen ngam mipui kan nih pawh a tul a. Roreltute pawh phuba lakna rilru pu lova insiamthat zel tumna rilru pu an nih a tul bawk.

Ram hmasawnna leh than zelna atan roreltu leh mipuite kan pawimawh ve ve a ni tih hre thar zel ila a tha awm e.