Lawngtlai District Petroleum Dealer ten an harsatna tawh chinfel an phut - tuialhthei lalut chhunzawm rih dawn lo

#ZabilianZ July 25: Lawngtlai District Petroleum Dealer ten an sumdawnnaa harsatna an tawh hrang hrang te chinfel a nih hma chuan July ni 29, 2024 atangin tuialhthei lakluh chhunzawm rih loh an tum.

Lawngtlai District-a Petroleum Dealer te chuan thuchhuah siamin, an sumdawnna kawnga harsatna siam thei zawngin pawn lam mi nasa takin an inrawlh niin an sawi a. Harsatna an tawh tam tak te chu mipuiin harsatna an tawh loh na turin ngawih bopui thin mahse, tha taka sumdawng thei tura zalenna an neih te diklo taka rahbehsak an nih chhoh tak avangin hma an la ve ta niin an sawi.

Oil Marketing Company guideline-in a phalsak anga engemawchen harsatna liantham tawk lova sumdawnna an kalpui tawh laia harsatna an tawk chho ta fo chu pawi an tih thu an sawi a. "Hleih nei taka rorelna awm thin te, kan customer ten hmun hrang hrangah harsatna an tawk ta fo mai te hi a tha kan ti lova, kan sumdawnna pawhin nasa takin a tawrh phah a ni" an ti.

Lawngtlai District Petroleum Dealer te chuan Oil Marketing Company atanga monthly sales target an tuk ang zat pawh tlin thei lo mai tur dinhmunah an ding ta mek hlawm niin an sawi a. Hetiang hi an dinhmun a nih tak avangin July ni 29, 2024 atang chuan an harsatna leh buainate chinfel a nih hma chu Lawngtlai District-a petrol pump zawng zawng ten tuialhthei lakluh chhunzawm rih lo ni se, an ti ta nia sawiin, an hmalakna avangin oil lama harsatna a thleng a nih pawhin mipuite hriatthiamna an ngen bawk.#zabilianz #zofatehuapzo