#ZabilianZ, July 02: Fur ruah sur nasa avangin tukin khan Zemabawk High School Vengah leiminin in a chhilh a, mi 3 in nunna an chan a, Zuangtui-ah in 4 a chim bawk.
Zemabawk Branch YMA hruaitute hnen atanga thudawn danin, tukin dar 5:30 vel khan Zemabawk High School Venga F. Lalrokima te chenna in chu, an kawmchhak leiminin a chhilh a, he in-a cheng :
Isaac Lalvenhima Chhangte (32), F. Lalrokima fapa
Lalrinchhani (25), Isaac Lalvenhima Chhangte nupui
Abigail Lalchhanhimi (4), Isaac Lalvenhima Chhangte fanu ten nunna an chan.
YMA hruaitute sawi danin, leiminin in a chhilh lai hian Isaac-a te chhungkua hi an room-ah an la mu a, an nu leh pa te erawh an tho tawh a, an insaseng hman a ni.
Chhiatna a thlen veleh thenawm hnai mi tlawmngai ten chhanchhuah hna an thawk nghal a, Isaac-a te room chhilhtu lei leh thing tlu te chu an thian nghal a, engemawchen lei tla an thenfai hnuah Isaac-a te mutna pindan chu an pawh theih ta a, an 3-in an lo thi tawh a ni.#zabilianz
Ruang hmu hmasatu ten an sawi danin, an pa ber Isaac-a hi thing tlu in a taksa thenkhat a delh a, a nupui leh an fanute erawhin hliam langsar an tuar lova, thaw chhamin an thi nia rin a ni.
Leiminin a chhilh hlum tak mi 3 te ruang hi hmuh an nih veleh postmortem nghal an ni a, Zemabawk Seventh day Adventist Biak in-ah lak niin, zaninah lumen an ni anga, naktukah vui an ni ang.
YMA hruaitu ten an sawi danin leiminna hmun hi hmun him, lei pawh nghet tha nia ngaih a ni a, nizan lamah pawh ruah a sur nasat avangin in neitu F. Lalrokima chuan an in leh a chhehvel te chu a endik a, lei tawlh mai tur awma lang a hmu lova, tukina chhiatna a thlen pawhin an thenawm hnai te chuan hmun dang zawk, tunhnaia lei min awmna ni turah an ngai a ni.#zabilianz
Tukin vek khan Zuangtui Veng, lei tlakhniam thinna hmunah pawh leimin avangin chenna in pali a chim a, mihring thi an awm lova, hmeichhe naupangin na vak lovin a kutah hliam a tuar.
Zuangtui Branch YMA hruaitu ten an sawi danin zing dar 5:30 velah Bawngkawn leh Zuangtui inpawhna kawng tum bula awm Varthanzauva te in chu a chim a, hei hian a thlanga in awm pathumte a hnawl thla vek bawk a. In chima cheng tam zawk chu an lo insaseng hman a, Sangchhuana te chhungkua erawh in chimah hian hun rei vaklo tangin, an tukverh atangin an vak chhuak thei a, an fanu in hliam na vaklo a tuar a ni.
Leiminna hmun hi la che thei reng a ni a, a bulhnaia cheng chhungkaw 12 in vawiin chhun lamah khan an chenna hi an chhuahsan a, chhungkaw tam zawk chuan an chhung te an bel rih phawt a, heng mi te chen lailawkna tur hi sorkar leh khawtlang hruaitu ten an ruahman dawn nia thudawn a ni.#zabilianz #zofatehuapzo
0 Comments