Larsap-in bawlhhlawh sawngbawlna hmun a enfiah

#ZabilianZ Oct 02: Larsap Indra Sena Reddy Nallu-a'n vawiin tlai khan Tuirial-a Solid Management Centre tlawhin, hmalakna hrang hrang - Mechanical Compost Plant, Vermi Compost Plant, Waste Resource Center, Waste Incinerator, Common Bio Medical Waste Treatment Plant leh Temporary Holding Area-te a enfiah a, a kaihhnawih department hotute a kawm bawk.

Larsap chuan khawpui thang zelah bawlhhlawh a pun chak avangin a nih dan tur ang taka bawlhhlawh lakkhawmte sawngbawl a tul thu a sawi a. Hmasawnna ruhrel lian leh pawimawh tak tak te enkawl zui leh tuaihnum kawngah tanrual a tul thu sawiin, "harsatna a awm a nih pawhin kan zavaia kan ngaihven tlan a tul a ni", a ti.

Tuirial-a Aizawl khawpui bawlhhlawh sawngbawlna - Solid Waste Management Centre hi UD&PA department hnuaia State Investment Programme Management and Implementation Unit (SIPMIU) hmalaknain North East Capital Cities Development Implementation Programme (NERCCDIP) hmanga sak niin, kum 2019 khan hawn a ni a, kum 2022-ah AMC kutah hlan a ni.#zabilianz

AMC-in an tarlan danin Aizawl khawpui chhunga bawlhhlawh sakhat chi te chu Pathianni tih loh ah chuan kar tluanin he hmunah hian phurhluha sawngbawl thin a ni a, hemi tur hian AMC chuan thawktu 35 a ruai a ni. Nitin bawlhhlawh paih truck 190 vel ten bawlhhlawh Ton 119.42 vel an chhungkhawm thin a; heng zinga Ton 89.09 chu bawlhhlawh hnawng (wet waste) niin, a dang Ton 30.33 chu bawlhhlawh ro (dry waste) a ni. Nitin dry waste Ton 7.98 vel chu hman nawn (recycle) leh theih turin AMC pawmpui scrap dealer 11 te hnenah hralh thin a ni a, wet waste-te chu Mechanical Compost Plant hmangin kumin March thla atang khan leitha ah chantir thin a ni thung.#zabilianz #zabilianznews #zofatehuapzo