#ZabilianZ Oct 17: Mizo Academy of Letters (MAL), Joint Headquarters, Lunglei-in vawiin khan Mizo thu leh hlaa thawh hlawkte hnena kum 3 dana an hlan ṭhin 'Pu Buanga Award' chu C. Chhuanvawra. Tuikhuahtlang, Aizawl hnenah an hlan.
Lunglei-a Art & Culture auditorium-ah Lunglei South bialtu MLA Lalramliana Papuia'n C Chhuanvawra hnenah Pu Buanga Award hi a hlan a. Zosap hmasaber zinga pakhat, Mizo hawrawp siamtu leh thu leh hla ṭha tak tak Mizote hnutchhiahtu, Mizo ṭawng thiam leh Mizo ṭawng mawina hria, chanchin tha baka ṭha dang tam tak Mizote petu Pu Buanga hming chawi chawimawina a dawng chu hlu a tih thu C. Chhuanvawra chuan sawiin, chhim leh hmara 'g' leh 'ng' lam rik dan inanglo pawi a tih thu sawiin, a dam chhung ngeia lam rik dan thuhmuna lam ri tura inremna awm se a duh thu a sawi bawk.
C. Chhuanvawra hi kum 1941 October ni 2-ah Leithumah a piang a. Kum 14 mi chauh a nih laiin, Khuangphah Primary School-ah zirtirtu hna a thawk tawh a. Kum 1956-1964 chhung zirtirtu hna a thawh hnuah zir chhunzawmin, Champhai College aṭangin kum 1975 ah BA a zova. Kum 1977 aṭangin Govt Middle School, Bukpuiah Headmaster a ni. Govt. Kulikawn Middle School leh Govt Boys Middle School (Sikulpui)-ah te thawk lehin, kum 2003 ah zirtirtu chawimawina sang 'National Award to Teachers' a dawng a. Kum 2009 a pension a ni.#zabilianznews
Kum 16 mi chauh a nih lai kum 1975-ah a thuziak hmasaber, 'Ka Hriat Ve Dan' tih a ziak a. Hla 72 phuahin, article 542 leh seminar paper 37 a ziak a. Kum 2023 thleng khan a lehkhabu ziah bu 17 chhuah a ni tawh. Primary School aṭanga University thlengin a kutchhuak hrang hrang 26 zirlaibuah seng luh a ni a. Literature huangah kum 2014 khan India rama civil chawimawina sang Padma Shri dawngin, Mizo Writers' Association leh Art & Culture Department-in kum 2009 ah thu leh hla thiam chawimawina an hlan a, kum 2012-ah Vulmawi lifetime achievement award (2012) a dawng bawk.
Pu Buanga Award hi kum 2000 aṭang khan MAL, Joint Headquarters, Lunglei-in Mizo thu leh hla lama thawhhlawk te hnenah a hlan ṭhin a. A tir lamah kum 5 danah hlan ṭhin niin, kum 2015 hnu aṭang khan kum 3 danah hlan a ni ta a. Pi Lalsangzuali Sailo hnenah hlan hmasakber niin, 2005-ah Pu B. Lalthangliana hnenah hlan a ni a. Kum 2010-ah Prof. Laltluangliana Khiangte, kum 2015-ah Pu Lalthangfala Sailo, kum 2028-ah Pu RK Lalhluna leh kum 2022-ah Prof. RL Thanmawia te hlan an lo ni tawh a. He chawimawina hian tangkapui (trophy), leh chawimawina thuziak bakah Rs. 10,000 a keng tel a ni.#zabilianz #zabilianznews #zofatehuapzo
0 Comments