Rev. Dr. Vanlal Nghaka Award leh Scholarship sem

#ZabilianZ Oct. 24: Rev. Dr. Vanlal Nghaka Award 2024 leh Scholarship 2024 chu vawiin khan R.B. McCabe Hall, Aijal Club-ah sem a ni a. Rev. Dr. Vanlal Nghaka Award hi nun puma Pathian rawngbawl, pension hnu pawha thahnemngai taka rawngbawl chhunzawm zel, mi entawntlak 2 hnenah hlan niin, scholarship chu mi 3 hnenah hlan a ni.

Rev. Dr. Vanlal Nghaka Foundation atanga Rev. Dr. Vanlal Nghaka Award 2024 dawngtu mi pahnih zinga pakhat zawk Upa Dr. LN Tluanga, Mission Veng - Kum 1980-ah kohhran upa atan thlan a ni a, 1982 ah School Education Director a nih laiin, hun puma rawngbawl turin missionary-ah a inpe a. Mizoram Synod tirhin Karibati ramah School Heasmaster hna a thawk a, a pension hnuah pawh kum 1987 khan a kal nawn leh a. Kum 1997-ah Interserve hnuaiah Delhi-ah Missionary hna a thawk leh a. Hemi hnu hian Synod Hospital Durtlang-ah Director hna te, English Congregation School Principal hna te a thawk leh bawk. India ram hmun hrang hranga mission conference-ah tun thlengin a la kal thin.

Rev. VL Zaithanga (L) - Kum 1967 ah Pastor atan nemngheh a ni a, thu leh hla lama tui, Christian literature lama thawhhlawk tak, thu ziak hmanga chanchintha hril hna thawk nasa a ni.

Zirlai scholarship dawngtu te :

1) Ruth Lalremruati, BD III Year, AICS
Venglai, Lunglei Baptist kohhranah lawiin, vanduaithlak takin chhungkaw chawmtu ber a pa-in Covid hri len lai khan a boral san a, a pa boral hlimchhawnah Pathian kohna chhangin, AICS-ah Pathian thu a zir a, a nu in dawrtê te siamin a chawm mek a. Harsatna kara Pathian kohna chhangtu a nih avangin he scholarship hi hlan a ni.

2) Chinneihkhawl, BD III Year, Serampore College
West Samphai khua, Churachandpur, Manipur-a cheng a ni a. Manipur a buai lai khan an chenna in hal chhiat vek a ni a, kum 2023 chawlh chhung pawh khan haw na tur in a nei lova, a chhungte pawh hmun hrang hrangah an awm a, zirna chhunzawm thei lo tura a inngaih hnuah a zir chhunzawm hram hram a, a tumruhna avangin he scholarship hi pek a ni.

3) Lalengkima Hnamte, BD IV Year, ATC
Ramhlun North, Aizawla cheng a ni a, zirlai thiam thei tak leh thahnemngai thei tak niin, zirna lama a tui, mi tam tak entawntlak a nih avangin he scholarship hi hlan a ni.

Rev. Dr. Vanlal Nghaka Award hi kum thum dana sem thin tura ruahman a ni a, zirlaite hnena scholarship hi kumtin sem tum a ni thung. Award leh scholarship hian thuziak bakah Rs. 50,000 a keng tel a ni.