Kumtlinglo hming, thlalak leh thil dang thehdarh a nih avangin MSCPCR-in thubuai an thehlut

#ZabilianZ Jan 13: Mizoram State Commission for Protection of Child Rights (MSCPCR)-in tunhnaiah naupang kumtlinglo, dan nena inrem lova che hming, thlalak, video leh a nihna tilang thei tur thildang te pholan social media hrang hrangah pholan leh puanzar a nih thu sawiin, hemi chuangchangah hian youtuber thenkhat leh facebooker thenkhat lakah thubuai an thehlut niin an sawi.

Hemi chungchangah hian MSCPCR Chairperson Pu Jimmy Laltlanmawia chuan January ni 9, 2025 khan Cyber Crime Police Station, Aizawl-ah FIR an thehlut tih a sawi a. Tunhnaiah naupang dan nena inrem lova che te hming, nihna, thlalak, video leh address te social media hrang hranga tarlan a ni leh thin chu ngaimawhawm an tih thu a sawi a. Hetianga tih hi 'The Juvenile Justice (Care & Protection of Children) Act, 2015, Section 74' in a khap tlat a nih thu a sawi.#zabilianz

Naupangte hming, address, thlalak, video leh a dangte pholan chu an lo than len huna khua leh tui tha an nih theihna tur kawng daltu leh midang ten an chhinchhiah bik theihna tur thil pawi tak a nih avangin dan chuan a khap tlat a ni tih MSCPCR Chairperson chuan a sawi a. "He dan bawhchhetu chu thla 6 thleng lung-in tantir leh cheng nuai 2 thleng chawitira hrem theih an ni," a ti bawk.

Commission chuan dan bawhchhetute hrem an nih theih nan hma a la zel dawn tih sawiin, MSCPCR Chairperson chuan internet social media leh digital media hmangtute chu fimkhur turin a chah a ni.#zabilianz #zabilianznews #zofatehuapzo