Party hrang hrangin pisa an hawng leh tan - kumthar inkhawmah an president ten thu an sawi

#ZabilianZ Jan 13: Political party hrang hrangin Krismas leh Kumthar chawlh an hman zawh hnu ah vawiin khan an pisa te an hawng tan leh ta a. Rorellai ZPM party pisa, kumin atana hawn tan leh inkhawm-ah an party President Lalliansawta'n thusawiin, "Kalphung thar mipui sorkar chuan a dinchhan ang ngeiin Mizoramah hmasawnna thar a thlen tir mek" a ti.

ZPM President chuan, mau tam avanga tam a tlak hnu ah rambuaiin Mizoram a nan chhoh dan te sawiin, amah ngei pawhin kum 4 zet Jail-ah hun a hman thu a sawi a. "UT ah kan ram chu hlankai a lo ni ta a, phuihnam chawr leh bahra laih tur inchuh thin khan Central sorkar atanga sum lo kal kan han inchuh leh ta" tiin, "kan ram tana project tha leh rotling tur ngaihtuahna kan nei pha meuh lova, mahni pumpuarna leh tanghmahai duhnain rilru a luah hneh hle" a ti bawk.

"State nih hnuah pawh chu rilru kan la paih hleithei lova, chutianga hun rei tak kan hman hnuah, kalphung thar mipui sorkar a lo dingchho ta a, he party-ah hian mipui ten beiseina thar neiin, an rilru tih harhin a awm chho ta mek a ni" a ti.#zabilianz

Vawiin thlenga kalphung thar mipui sorkar kal dan thlirin Mizoram chu a la dingchhuak ve ngei dawn nia a lan thu ZPM President chuan a sawi a. hmasawnna chhenfakawm sawi tur an hnutchhiah chho mek niin a sawi bawk.

MNF party pawhin an party pisa Mizo Hnam Run-ah inkhawm buatsaihin, an President Zoramthanga'n thu a sawi a. "Inthlana tlaknate hi vanpui chim ang maia ngaih tur a ni lo, a dawt atana kan chakna tur a ni", a ti.#zabilianz

Zoramthanga chuan ZPM sorkar thil tih thenkhat sawiin, VC thlan hun pangngai chu August thla lam tur ni mahse, chhan tha tak awm si lovin sorkar martial law-in February-a inthlang turin VC term chu an pawhtawi sak niin a sawi a. Hei hi a nihphung tur a nih loh avangin Minister ten an insawifiahsiak nia sawiin, chhuanlam tur pawh an sawi dik thei lo niin a sawi.

Lengpui airport chungchang pawh sawiin, "Air Force kuta pek an tum ngawt te kha khawvela awm ngai lo a ni" MNF President chuan a ti a. "Sipai kuta kan hrawk rehtir tlat ang a ni a, keini chuan a tawp thlengin kan do zel dawn" a ti bawk.#zabilianz

MNF President chuan Buhfai man a leta vawilehkhata tih to thut pawh tha an tih loh thu leh hetiang a nih chuan kum 2028-ah MNF tlinpui kum a thlen a rin thu a sawi a. Buhfai man pawh an ennawn tur thu leh petrol leh diesel man cheng sariha tih to pawh MNF chuan an ngaihtuah that tur thu a sawi.

"SASCI pawh an duhdanin an han kalpui a, kan hnathawh sa chhunzawm lovin an insem a, utilization certificate an pek mumal theih loh avangin kum khata Rs. Vbc 500 vel hmuh thin kha, Rs vbc 250 chu an chan der tawh" Zoramthanga chuan a ti a. "Kumin hian Delhi khawngaihna an dawng lo a nih chuan an buai hle dawn" a ti.#zabilianz

Kawngpui chhe lutuk chungchang te, sorkar financial management chungchang pawh sawiin, MNF President chuan "a ngaihna a awm ngang lo" a ti a "A hmaa min demna zawng zawng kha tunah chuan an hmachhawn ve ta a. Hlawh tur an puk reng a, contractor bill an pe thei lova, khawiah pawh pawisa van thu bak sawi tur a awm lo" a ti bawk a ni.

Mizoram Pradesh Congress Committee (MPCC) pawhin Congress Bhavan Golden Hall-ah hun hmangin an President Lal Thanzara'n kumthar thuchah a sawi a. Kumthar atana an party mi te a chah duh chu Thufingte 16:3 thu 'Lalpaa innghatin thil ti la, i thil tum chu a hlawhtling ngei ngei ang,' tih a nih thu a sawi.#zabilianz

MPCC President chuan Mizoram sawrkarin Central-a project a zu thehluh te chu Central sawrkarin tihhlawhtlin an chak viau lo niin a hmelhriat pakhat, Central BJP hruaitute nena innel tak pakhatin a sawi niin a sawi a. He thu sawitu hian dawt a sawi a rin loh thu MPCC President chuan a sawi bawk.

Sawrkarin VC term pawt tawiin Febuary ni 19 ah a tawp dawn tih MPCC President chuan sawiin, chumi hma chuan VC inthlan a ngai dawn tih a sawi a. "Sawhthing an lei theih dawn leh dawn loh hriat a nih hma inthlan zawhfel ah duh a, VC inthlan zawhah chauh sorkarin sawhthing lei an tum a ni" a ti.#zabilianz

MPCC President chuan "Tuirial Hydel Project, MNF ten nasa taka an sawpchhiat tawh Pu Lal Thanhawla hova kan tharthawh leh a kan tihpuitlin tak pawh hmanni lawk khan Power Minister chuan sumthuninu a nih thu a sawi" tiin, anchhe dawng angah an chhuah niin a sawi a. "Chief Minister Adviser pakhat phei chuan, 'Bomb chhiat law law tur emawni.' a ti a ni awm e" a ti bawk.

NLUP pawh an tharthawh leh tur thu MPCC President chuan a sawi a. Ram leh mipui thatna tura sawrkar hmalakna te chu Congress party chuan an thlawp zel tur thu a sawi bawk a ni.#zabilianz #zabilianznews #zofatehuapzo