IAF kuta Airport hlan duhlotu ten kum 2011-ah ram acre 32-a zau Jet Fighter thuhrukna tur an lo pe tawh :Adviser to CM (Fin)

#ZabilianZ Feb 17: Adviser to Chief Minister (Finance) TBC Lalvenchhunga'n IAF kuta Airport hlan duhlotu ten kum 2011-ah ram Acre 32 zet Jet Fighter thuhrukna tur an lo pe tawh niin a sawi a. "tun dinhmunah a hlau ber anga an rawn au leh si hi a mak hlein ka hria,” a ti.

ZPM party chhung inkhawm vawiina neihah he thu hi TBC Lalvenchhunga chuan a sawi a. "IAF kutah Airport kan pe dawn lova, kan ramin a hlawkpui theihna tur leh changtlung zawka siam kan tum mai a ni" a ti bawk.

Kum 2019 leh 2022 ah MNF sorkar pawhin Lengpui-ah ram acre 97-a zau leh Sihphir-ah acre 5-a zau chu IAF hnenah No objection an lo pe tawh niin TBC Lalvenchhunga chuan a sawi a. "Kum 2022-ah AAI in Mizoram sorkar-ah MoU draft a rawn thawn leh a, khatihlaia sorkar MNF-in an tihpuitlin hmain sorkar a inthlak chho zui ta mai zawk a ni" tiin, "ZPM sorkar hmalakna a ni bik lova, party pahnih sorkar tawh te hma lo lak tawh kan bawhzui mai a ni" a ti.#zabilianz

Adviser to CM (Finance) chuan Lengpui Airport chu mithiam te nen kawng hrang hranga zirchian a nih thu sawiin, "Wing Comdr. Pu J Lallhmingliana hi kan zirchiannaa kan thawn hmasaber a, min chhanna chu Airport kan enkawl zawh loh thu leh AAI-in a dratf an neih ang IAF atanga nei ve phawt tura thurawn a ni" tiin, J. Lalhmingliana thurawn anga an kal mek laiin a ni lo zawngin media hrang hrangah sawi a awm ta niin a sawi a. Airport chungchangah Wing Commander senior dang te leh service lai mek te pawh an rawn nasa hle niin a sawi bawk.

TBC Lalvenchhunga chuan, Mizorama ZPM a awm hnuah danglamna nasa tak a thleng nia sawiin, inthlan leh a vuakvet pawh a felfai a, ruaitheh leh lawmna siam mup mup te a bo niin a sawi a. Local Council inthlan zawh takah an party naupan ngaihtuahin hma an sawn hle nia sawiin, LC leh VC-a seat tlemte nei ve chauh thin kha a sang berah an awm ta tih a sawi.#zabilianz

Adviser to CM (Finance) chuan “ZPM chuan year of consolidation kan puang a, austerity measure kan la bawk a, department hrang hrangte sum hman dan budget kan present dawn a, a rawn lang dawn a ni" a ti a.  "PWD-a hma kan sawnna te hi a lawmawm ka ti a, Finance Minister leh CM ni bawkin kan ram kawngte a vei em em, sum an mamawh ang te an department budget piah lam vaibelchhe 180 vel pek belh an ni a, an kawng siam pawh tun hma ai chuan a tlo turah ka ngai" a ti.

UD&PA in kum khat chhunga reform target an thawh that em avangin Rs. vaibelchhe 300 an dawng nia sawiin, "Revenue-ah Rs. vaibelchhe 15 kan dawng a, Finance achievement avangin Rs. vaibelchhe 250 dawn kan la inbeisei bawk" a ti a. Department hrang hrang thawh that chhan chu enkawltu Minister te taimakna rah niin Adviser to CM (Finance) TBC Lalvenchhunga chuan a sawi.#zabilianz

Ram siamthat an tumna kawngah huai takin administrative reform an kalpui mek nia sawiin, hun reilote chhunga an hnathawhte avangin sorkar laipui atangin beisei phak loh sum tam tak an dawng tan mek niin a sawi bawk.#zabilianz #zabilianznews #zofatehuapzo