#ZabilianZ Apr 13: Vawiin tlai khan Vairengte Kuhva Society hruaitu ten dan lova kuhva ro tawlhruk ni ngeia hriat truck pali hmanga phurh chu endikin, truck khalhtute chu an tlanbo nghal nia an hriat thu an sawi.
Dan lova kuhva ro tawlhruk nia hriat phurtu truck pali te hi Champhai district registration vek niin, tun thla ni 10 zing karah khan Vairengte police checkgate an thlen hmain Vairengte daia Taxation data entry centre-ah din tir an ni a. Din tir an nih hnu hian a khalhtute chu an tlanbo nia hriat niin, Vairengte Police hriattir nghal an ni.
Vairengte kuhva society hruaitute chuan sorkarin kuhva ro tawlh khapna thupek a chhuah reng chungin, tunlai hian a rukin kuhva ro tawlh a kal reng niin an sawi a. Hei hi tuntuma Vairengte checkgate paltlang tum truck pali man an ni hian a tichiang hle nia sawiin, sorkar pawhin nasa leh zuala tan a lak a ngai nia an hriat thu an sawi bawk.#zabilianz
Mizoram State Legislative Assembly 9-na thutkhawm vawilina zawh taka Eptu member, Tuirial bialtu K. Laldawngliana zawhna Home Minister K. Sanpdanga'n ziaka a chhannaa a lan danin, kum kalta 2024 chhung khan Mizoram Police-in dan lova tawlhruk kuhva ro bag 20,645 (kg. 13,80,248) an man a. Nikum chhunga dan lova tawlhruk kuhva ro man te hi tualchhung rate-ah Rs. 20,12,86,400 vela chhut a nih thu a tarlang bawk.
Nikum chhunga Mizoram Police-in dan lova tawlhruk kuhva ro neitute thubuai siamsak an nih leh nih loh leh mi engzatnge thubuai siamsak an nih zawhna chu Home Minister chuan regular case 3 siam a nih thu leh a bak zawng chu Custom Preventive Force-ah dan anga hmalak tura hlanchhawn a nih thuin a chhang a. Thubuai te chu N. Vanlaiphai Police Station, Aizawl Police Station leh Bawngkawn Police Station-ah pakhat theuh ziahluh a nih thuin chhang a ni.#zabilianz #zabilianznews #zofatehuapzo
0 Comments