Laldenga Cultural Centre aiah Aizawl Green Park

#ZabilianZ May 05: Assam Rifles ram advisory committee chu vawiin khan Chief Minister Lalduhoma hovin a vawikhat nan an thukhawm a. An thu ngaihtuahho zingah AR chhuahsan rama Laldenga Cultural Centre sak tura ruahman aiah Aizawl Green Park siam rawtna a tel.

Babutlang-a AR chhuahsan ram, Zarkawt veng joint action committee kuta hlan chungchang pawh vawiina AR ram advisory committee thu ngaihtuah zingah a tel nia hriat a ni a. AR chhuansan rama Legislative Assembly Complex din tura ruahmanna pawh an thu ngaihtuah zingah a tel. AR biak in hmun Mizoram Synod hnena pek rawtna te, parking lot siam chungchang te, Bethlem Branch YMA-in YMA plantation siam an rawtna te pawh a tel nia hriat a ni.

Home department-in AR memorial din an rawtna leh Mizoram Florist’s Association-in pangpar zawhna hmunpui emaw show house emaw din an rawtna te, INTACH, Mizoram Chapter-in AR cantonment building vawnthat an rawtna te, UD&PA department-in ropeway project siam tura an ruahmanna te leh P&E department-in sub-station an dinna tur te, Mizoram Gorkha Mandir Sanchalan Samiti Bazar Area, Aizawl-in AR rama Hari Mandir chu awm chhunzawm se, tia an rawtna te bakah Aizawl Hmathlir Pawl (AHP) atanga rawtna lut AR chhuahsan rama Mizoram Police duty dah chungchang te leh mimak leh pawl hrang hrang atanga rawtna lut te AR ram advisory committee thukhawm hian an ngaihtuah a. UD & PA department-in master plan an lo duan chhin pawh thlir hovin, a tul anga thlirho leh atan an dah.

Vawiina thutkhawmah hian Commissioner, GAD Vanlaldina Fanai chuan AR chhuahsan rama building la awm te man atan vbc. Rs. 5 vel pek a ngai dawn nia a lan thu a sawi a. He committee hian AR ram chhunga ram nei mimal, pawl leh kohhran te chu an ram pass te sawrkara hlan let vek tur leh ram nei thenkhat court-a sawrkar khing mek te pawh an thubuaite hnukkir tura ngen ni se, tiin, Sipai chhuahsan ram chu mimal, pawl, party, NGO leh kohhran kutah lut lo se, an ti bawk.#zabilianz #zabilianznews #zofatehuapzo