#ZabilianZ June 27: Khawvela Journalism chawimawina ngaihhlut hlawh tak, June 26, 2025-a semchhuah Emmy Awards dawngtu team zingah All India Radio Aizawl News Editor pahnih an tel.
BBC team-a Mizo hming lang pahnih te hi Mizo journalist, AIR Editor pahnih Pu HC Vanlalruata leh Pu Isaac Zoramsanga te an ni a, Emmy Awards Palladium Times Square, New York City atanga sem chhuah Emmy Awards-ah hian 'Myanmar’s Civil War' tih thupui hmanga BBC in an buatsaih short-form documentary chu National Academy of Television Arts & Sciences (NATAS)-in News & Documentary Emmy Awards, vawi 46-na a buatsaihah Outstanding Continuing News Coverage – Short Form category-ah award an dawng a ni.#zabilianznews
Mizo journalist pahnihte hian BBC tana project-ah hian field producer hna an thawk a, Myanmar chhim lam Chin State-a ni 10 chhung reporting mission an neih chhungin, ground-level support pawimawh tak tak an thawk a. An hnathawh avang hian BBC team-in hmun ril leh thuk zawk, hnam sipai leh Myanmar sipai junta-te inkahna hmunte, hnam sipai inbunna hmunte an luhchilh theih phah a ni.
Minute 6 leh second 5-a rei documentary hian tualchhung hnam sipai pawlte'n hmun engemawzat atanga sipaite an hnawhchhuah dan a entir a. Chutih rualin, junta-in hnam sipai pawl tihtawp leh thalaite ralthuam hmanga an tihduhdahna, rukbo leh thah chungchanga report lungchhiatthlak tak takte pawh a pholang bawk.#zabilianz #zabilianznews #zofatehuapzo
0 Comments