MZP-in Aizawl Lammuala Remna Ni lawm turin mi zawng zawng an sawm

#ZabilianZ June 21: Kum 20 chhung Mizoram a buai hnua June ni 30, 1986 zana MNF leh India sawrkar-in remna thu an thlun champha -Remna Ni- lawm leh turin MZP a inbuatsaih leh mek a, kumin Remna Ni chu Aizawl Lammual-ah Chief Minister Lalduhoma hova lawm tura ruahmanna an siam thu an sawi.

MZP chuan kumin Remna Ni ah hian sikul hrang hrangin cheraw kanin, zai leh lam leh thusawi te bakah lemchan te-a hun hman a nih tur thu an sawi a. Mizo mipui zawng zawng he hun hmang tur hian an sawm a ni.#zabilianznews

Kum 20 zet ram a buai hnua remna leh muanna lo awm ta chu Mizo mipuite tawngtai chhanna a nih thu MZP chuan sawiin, "lawm a phu a ni" an ti . "Zirlaite phei chuan a hlut zia leh Mizote hun pawimawh a nih zia kan inhrilh thar zel a tul takzet a ni" an ti.

Remna Ni chu Mizo mipuite tana hun pawimawh, lungrual taka lawm ho tur ni mahse, political party-te ngaihdan inang lo thin avangin Remna Ni pawh inhnial na ni ah a chang thin a, hun pawh an hmang ho hleithei thin lo. Hei hi MZP chuan thalo tiin, kum 2018 atangin kumtin Remna Ni lawman hun chu an buatsaih ta thin a ni.#zabilianznews

MZP hian remna atana thawhhlawk mi hrang hrang te Remna i ah an lo chawimawi tawh thin a. Kum 2018-ah Lal Thanhawla, Laldenga, Lalkhama te chawimawiin, kum 2019-ah Rev. Dr. HS. Luaia, Rev. Dr. Zairema, Rev. Dr. Lalngurauva Ralte leh Lalduhoma te an chawimawi a. Kum 2022-ah Rev. Dr. Lalsawma chawimawiin, kum 2023-ah Mizoram Kohhran Hruaitute Committee hnenah chawimawina an hlan a. Kum 2024-ah JH. Rothuama, P. Lalupa, Lalthanzauva leh Ngurchhina te hnenah chawimawina an hlan bawk.

Remna atana kawng hrang hranga thawhhlawk te chawimawi zel an la tum thu sawiin, MZP chuan kuminah erawh chuan chawimawina hlan an neih loh tur thu an sawi a ni.#zabilianz #zabilianznews #zofatehuapzo